Niaqornani toqutsisimaneq pillugu suliaq: Angut mianersuaalliorsimasutut ukioq ataaseq qaammatillu pingasut pineqaatissinneqarpoq
Niaqornani angummik 58-inik ukiulimmik qoorortuumik niuatigut aallaallugu toqutsisimaneq pillugu ullumi sisamanngornermi eqqartuussisoqarpoq.
Angut 39-nik ukiulik Avannaani Niaqornaneersoq mianersuaalliorluni toqutsisimasutut pineqaatissinneqarsimasunut ukiumi ataatsimi qaammatinilu pingasuni inissiiisarfimiittussanngorlugu eqqartuuneqarpoq.
- Unnerluutigineqartup aallaammik ilisimanninnera, aallaasillu qanoq paarineqarimanera eqqartuussivisiup tunngavilersuutigisorujussuuvaa. Angut nunaqarfimmi qimminik toqoraasuuvoq taavalu aamma piniartuulluni. Taamaammat eqqartuussiviup misilittagaqarnera tunngavilersuutigivaat, aammali toqutsinissamik siunertaqarsimanngitsoq naliliilluni, Kalaallit Nunaanni Politiini unnerluussisussaatitaasoq, Martin Nielsen, oqarpoq.
AAMMA ATUARUK Angut 38-nik ukiulik Niaqornaneersoq toqutsisutut unnerluunneqassaaq
Tamanna pillugu suliaq Qaasuitsup Ilulissani Eqqartuussisoqarfiani ullut pingasut matuma siornatigut aallartippoq.
Martin Nielsenip oqarnera naapertorlugu pineqaatissinneqartup toqutaasoq angaarigaa, qanimullu attaveqatigiilluartuusut.
- Suliaq una alianartorujussuusoq, taamaalilluni ullumi naammassineqarpoq, Martin Nielsen oqarpoq.
Politiit Danmarkimit ikioqqusut
Angut 58-inik ukiulik qoorortuumik kaliber 22-250-imik niumigut talerperlikkut 2022-mi tallimanngornermi januaarip 21-ani aallaaneqarpoq.
Politiit Niaqornanilu kommunefogedi tamanna pillugu misissuilereerlutik angut 39-nik ukiulik tigusaraat.
Angut 39-nik ukiulik toqutsisimasutut pasineqarluni taamaniilli suli maannamut tigummigallagaavoq. Angutip pasisap nalunaaquttap akunnerini 72-ini tigummigallagassanngortinneqarnera unnerluussisussaatitaasumit illersuisumillu suliareqqitassanngortinneqarpoq. Pasisarlu ulluni 26-ni tigummigallagaassasoq, Nunatta Eqqartuussisuuneqarfiani kingornatigut aalajangerneqarpoq.
39-nik ukiulik januarimiilli tigummigallagaasimasoq ullumi sisamanngornermi iperagaasoq, Martin Strandby Nielsen oqarpoq. Eqqartuunneqartulli pineqaatissiissutip piffissalerneqarnerata pingajorarterutaani tigummigallagaareermat, pineqaatissiissutip sinnerani Pineqaatissinneqarsimasunut Inissiisarfimmiittussanngortinneqassanersoq, Pinerlussimasunut Isumaginnittoqarfiup nalilerumaarpaa.
AAMMA ATUARUK Niaqornani toqutsinermik suliaq: Angut ulluni 26-ni tigummigallarneqassaaq
Kalaallit Nunaanni Politiit toqutsisoqarsimasutut suliamik misissuinerminni naalagaaffiup politiivinit toqusullu timaanik misissuisartumit ikioqqupput, tamannalu angutip 38-nik ukiullip toqutsisimasutut pasineqarluni unnerluutigineqarneranik kinguneqarpoq.
Angut 39-nik ukiulik unnerluussisussaatitaasunit pinerluttulerinermi inatsimmi pragraf 86-imi immikkoortoq 1 naapertorlugu toqutsisimasutut unnerluutigineqarpoq.
Illersuisup eqqartuussut akueraa. Unnerluussisussaatitaasup suliaq suliassanngorteqqissanerlugu isummertigani eqqartuussutip atuarluaqqaarnissaanut piffissaqaqqaarumavoq, suliarli naammassisutut nalilissalluni naatsorsuutigaa.