Niaqornani toqutsinermik suliaq: Angut ulluni 26-ni tigummigallarneqassaaq
Nunatta Eqqartuussisuuneqarfia aalajangiivoq angut 38-nik ukiulik angummik 57-inik ukiulimmik Niaqornaneersumik toqutsisimasutut unnerluunneqartoq ulluni 26-ni tigummigallarneqassasoq.
Kalaallit Nunaata Politiivi taama nalunaarput.
Arfininngormat politiit nalunaarput tallimanngormat angut 57-inik ukiulik Niaqornani qoorortuumik aallaallugu toqunneqarsimasoq.
Niaqornat kommunefogediat suleqatigalugu politiit pinerlussimanermik paasiniaaneq aallartippaat unnerluunneqartup tigusarineqarneranik kinguneqartumik.
Arfininngormat angut Ilulissani Qaasuitsup Eqqartuussiviani sassartinneqarpoq. Eqqartuussiviup aalajangerpaa unnerluussaasup tigummineqarnera nalunaaquttap akunnerinik 72-inik sivitsorneqassasoq.
AAMMA ATUARUK Angut Niaqornani toqutsisimasutut suli tigusaaqqasoq
Aalajangiineq taanna unnerluussisup aamma illersuisup Nunatta Eqqartuussisuuneranut ingerlateqqippaa.
Nunatta Eqqartuussisuuneqarfiata suliaq ingerlatereerpaa aalajangiilunilu angutip ulluni 26-ini tigummineqarnissaanik unnerluussisup qinnuteqaataa akueriniarlugu. Kalaallit Nunaata Politiivi KNR-imut taama nalunaarput.
Unnerluunneqartoq unnerluussummut pinngitsuunerarpoq, illersuisullu Eqqartuussiviup aalajangeereerneratigut Nunatta Eqqartuusisuuneqarfianut qinnutigaa 38-nik ukiulik iperagaassasoq.