Angut Niaqornani toqutsisimasutut suli tigusaaqqasoq

Angut 38-nik ukiulik Ilulissani eqqartuussivimmi sassartinneqarpoq. Taanna angummik 57-inik ukiulimmik, nunaqarfimmi Niaqornani toqutsisimasutut pasineqarpoq.

Pasineqartup akunnerni 72-ini tigummigallarneqarnissaa eqqartuussiviup aalajangerpaa.

AAMMA ATUARUK Angut Niaqornani aallaaneqarluni toqutaasoq

Aalajangiineq tamanna unnerluussisussaatitaasup illersuisullu nunatta eqqartuussisuuneqarfianut ingerlateqqippaat. Kalaallit Nunaanni Politiit KNR-imut paasissutissiipput.

Pasineqartoq unnerluutigineqartumut pinngitsuunerarpoq, illersuisullu iperagaatitsisoqarnissaa piumasaraa. Politiit suliaq toqutsisoqarnerani suliatut misissuiffigaat, unnerluussisussaatitaasullu angutip ulluni 26-ni tigummigallarneqarnissaa piumasaraat. Kalaallit Nunaanni Politiit attaveqaqatigiinnermut immikkoortortaqarfianit, Fabian Uth Nielsen paasissutissiivoq.

Angut 57-inik ukiulik Niaqornaneersoq qoorortuumik aallaaneqarsimasoq, Kalaallit Nunaanni Politiit arfininngormat paasissutissiissutigaat.

Politiit Niaqornani kommunfogedi suleqatigalugu misissuineq aallartippaat, tamannalu pasineqartup tigusaaneranik kinguneqarpoq.