Angut Niaqornani aallaaneqarluni toqutaasoq

Niaqornani angut 57-inik ukiulik aallaaneqarluni toquvoq.

Inuk ataaseq toqutsisimasutut pasineqarluni politiinit tigusarineqarpoq.

Kalaallit Nunaanni Politiit tusagassiutinut arfininngornermi taama nalunaaruteqarput.

Angut nunaqarfimmi aallaaneqarsimasoq politiit ippassaq tallimanngornermi ualikkut nalunaaqutaq tallimat qaangerlugit tanneq sisamat kalerrinneqarput.

Niaqornani kommunfogedi suleqatigalugu angut aallaasersorsimasutut pasineqartoq kingorna taava tigusarineqarpoq, tigusarineqartorlu toqutsisimasutut maanna unnerluutigineqarluni.

Inatsit tunngaviusoq naapertorlugu Ilulissani killisiuisoqassaaq

Politiit marluk nakorsarlu arfininngornermi nunaqarfiliartinneqarput, tassani misissueqataassallutik.

Toqutaasoq toqutsisutullu unnerluutigineqartoq pilersaarutit naapertorlugit qulimiguulimmik maanna Ilulissiaanneqassapput. Toqutsisimasutut unnerluutigineqartup inatsit tunngaviusoq naapertorlugu eqqartuussisuuneqarfimmut sassartinneqarluni killisiorneqarnissaa maanna pilersaarutaavoq.

Toqutaasup nakorsamit sapaatit-akunnerata tulliata aallartisimalaarnerani aamma misissorneqarnissaa pilersaarutaavoq.

Politiit Danmarkimit ikiorneqassapput

Kalaallit Nunaanni Politiit, naalagaaffiup politiivisa immikkoortoqarfiannit Nationalt Kriminalteknisk Centerimit aamma ikiorneqassapput, kriminalteknikerit marluk, nakorsarlu toqusunik misissuisartoq nunatsinnukartinneqassallutik.

Taakku pilersaarutit naapertorlugit nunatsinnut marlunngorpat tikissapput.

Niaqornani toqutsisoqarneranut atatillugu suli misissuisoqarmat politiit itinerusumik maanna oqaaseqarsinnaanngikkallarput.