Timmisartuaqqap Nuummi ajutoorneranut unittaataata ajoquteqarnera pissutaasoq

Ajutoornerit pillugit misissueqqissaartartut nalunaarusiaanni taama inerniliisoqarpoq.

Timmisartuaraq ajutoormat inunnik ajoqusertoqanngilaq, timmisartuararli annertunngikkaluamik ajoquserluni.

Hydraulikvæskemik pisagaata ruujoriisa katersuuffiata aserorsimanera pissutaalluni hydraulikvæskemik maqisoortoqarpoq, timmisartuaqqallu unittaataa tamanna pillugu atorneqarsinnaasimanngitsoq, ajutoornerit pillugit misissueqqissaartartut misissuinerisa takutippaat.

Timmisartortartup timmisartup unittaataa minnermi atorniaraluarpaa, unittaataali talerperleq taamaallaat atorsinnaasimallugu. Timmisartuaraq tamanna pillugu minnermi talerpimmut sangusoorpoq.

AAMMA ATUARUK Timmisartoq mittarfiup sinaanut ingerlaannartoortoq

Timmisartortartup timmisartoq saamimmut sanguteqqissinnaasimavaa, mittarfilli takivallaannginnera pissutaalluni timmisartuaraq mittarfiup avataanut ingerlaannartussanngulermat timmisartup unittaataa atoqqippaa, timmisartuararlu tamanna pillugu talerpimmut sangoqqilluni mittarfiup avataanut niffarlukuni unippoq.

Hydralikvæskep maqisoornera ajutoornermut pissutaasutuaasoq, ajutoornernik misissuisartut inerniliuppaat. Timmisartortartup iliuusissani malippai, sila mittarfillu ajornartorsiulernermut pissutaanatik, nalunaarusiortut oqarput.

Timmisartuaraq Cirrus Nuummut orseriartuinnartussaagaluartoq pineqarpoq. Taanna Canadamit Islandimut ingerlaaraluarpoq.