Trump: USA Iranimi pisunut akuliunnissamut piareersimavoq

Iranimi eqqissisimasumik akerliussutsimik takutitsisunik aallaanninnikkut toqoraasoqalissappat, USA-p akerliussutsimik takutitsisut ikiorumaarpai.

USA-p præsidentia Donald Trump inoqatinut attaveqaatini Truth Socialimi taama allappoq.

- Iranimi eqqissisimasumik akerliussutsimik takutitsisunik aallaanninnikkut nakuusernikkullu toqoraasoqalissappat, soorlu taamaaliortarnermik ileqquliussisimasut, USA-p akerliussutsimik takutitsisut ikiussavai, Trump allappoq nangillunilu:

- Sakkulersornissamut piareersimavugut.

USA-p akuliunnera nunap immikkoortuani tamarmi uivertitsissasoq, tallimanngornermi Iranimit oqaatigineqarpoq.

Taama oqarpoq Ali Larijani, Iranip siulersuisuisa qullersaata, Ayatollah Ali Khamenei-p, siunnersortaa.

Iranimi aqqusinerni ulluni arlalinni akerliussutsimik takutitsisoqarpoq.

Akerliussutsimik takutitsisut amerliartortut

Akerliussutsimik takutitsinerit illoqarfiit pingaarnersaanni Teheranimi sapaatiummat aallartipput, tassani pisiniarfiutillit akit qaffakkiartornerat aningaasaqarnerullu ingerlanerliornera pissutigalugit suliumajunnaarmata. Tamatuma kingorna nunap ilaanut allanut akerliussutsimik takutitsinerit siaruaapput.

Marlunngornermi universitetini arlalinni ilinniartut akerliussutsimik takutitsinermut ilanngutereernerisa kingorna tamanna pivoq.

Akerliussutsimik takutitsinermi toqutaasut pillugit nalunaarutit siulliit nunap tusagassiiviinit sisamanngornermi tusarliunneqarput.

Inuit arfinillit toqutaasimasutut nalunaarutigineqarput.

Illoqarfimmi Lordeganimi nunap kujataata kitaaniittumi isumannaallisaanermut sakkutuut akerliussutsimillu takutitsisut aporaanneranni inuit marluk toqutaasut, nutaarsiassaqartitsivik Fars nalunaarpoq.

Inuit pingasut toqutaasut

Tamatuma saniatigut inuit allat pingasut illoqarfimmi Aznami nunap kitaaniittumi toqutaasut, nutaarsiassaqartitsivik allappoq. Tassani „pikitsitsisut eqimattat akerliussutsimik takutitsisut katersuunnerannik atorluaanermikkut politeeqarfik saassuppaat“.

Inuit pingasut toqutaanerisa saniatigut 17-it ikiligaasut, Fars nalunaarpoq.

Iranimi isumannaallisaanermut sakkutuut ilaat illoqarfimmi Kouhdashtimi toqutaasimasoq, tamatuma nalaani naalagaaffimmi tv-kkut aallakaatinneqartumi siusinnerusukkut nalunaarutigineqarpoq.

Angut 21-nik ukiulik pikitsitsisunut Basijinut attuumassuteqartoq pingasunngornermi unnukkut toqutaavoq. Iranimi oqartussaasut pinerluttut „pikitsitsisutut“ taavaat oqarlutik toqutaasoq eqqissineq attatiinnarniarlugu iliuuseqartoq.

Kangiani Qiterlermi nunap tamatuma præsidentiata, Masoud Pezeshkianip, pissutsit eqqissisarniaraluarpai akerliussutsimillu takutitsisut „piumasaqaataat naapertuilluartut“ akueralugit.

Nunap aningaasaqarnerata pitsaanerulersinnissaa anguniarlugu naalakkersuisut iliuuseqartariaqartut, sisamanngornermi eqqartuivoq.

/Ritzau/