Timersortartoq Arctic Winter Gamesimi unamminissaminut piareersimalluartoq, allanngungaatsiartoqarnikuuvorli

Issittormiut pinnguaataat, sulorartartut, eqqillit pinnguaataat, ujakkaarnerit snowboarderternerit aammalu kulturikkut pikialaartitsinissamut aaqqissuussat Mat-Su-mi sapaatiuppat aallartissapput. Unammialersorlu pilerivoq.

19-inik ukiulik, Nicas Clasen Ilulissaneersoq timersortartut ukioq manna issittumi unammiuaanermi peqataasussat ilagaat. Tanna Issittormiut Pinnguaataannik unamminermi peqataassaaq. Unamminerit taakku aqqanilinnik assigiinngitsunik immikkoortortaqarput. Nicas Clasenilu Pukusuk Atorlugu Noqqoruunnermi aamma Naggussanik Pississaarnermi ilaatigut unammissaaq.

Taanna siorna aamma peqataavoq, juniorillu unammineranni angusarissaarluni, siornamiilli ukioq mannamut allanngortoqarpoq.

Ukioq mannami seniorini unammerngaartussaavoq.

- Qilaanarnaq pissanganaq.

- Ukioq kingulleq AWG-ratta, sledge jumpimi 1-inngorama pakassunnermilu, kisianni angutini pakassummittussaanngilagut, taanna oqarpoq.

Nicas Clasen Arctic Winter Games 2023-mi tallimanik ujaminnappoq. Kuultit marluk, sølvit marluk bronzelu ataaseq

Anguniagaqartoq

Naalli Nicas Clasen seniorini aatsaat siullermeerluni peqataasussaagaluarluni imminut naatsorsuuteqarfigingaatsiarpoq.

- Ukioq kingulleq medajlennassutikukka angorusuppakka, taanna oqarpoq.

Tamannali piviusorsiornerunersoq naluaa, ukioq mannami unamminermi qanoq angusaqarnissani naluaa.

- Asukiaq inersimasut sakkortunerungamik naluara.

Ataaserli qularutiginngilaa. Tassa holdeqatini Alaskamut aallannginnerminni Nuummi katersuuteqatigisani ataatsimooqatigalugit nuannisarnissaq.

AWG-mi Nicas Clasenimummi unamminermut kisimi tunnganngilaq.

- Sungiusarluarnerunissaq takutitsilluarnissarlu immaqa pingaarneruvoq, taanna oqarpoq.

Timersortartut katillugit 66-it Mat-Su-mi marsip qulinganit 16-inut unammeqataassapput. Arctic Winter Gamesimilu Issittormiut Pinnguaataat aamma Eqqillit Pinnguaataat kisimik seniorinik unammiffiusussaapput. Timersuutit sinneri nukappiaqqat niviarsiaqqallu 18-it ataallugit ukioqartut unammiffigissavaat.

Arctic Winter Gamesimi nalinginnaasumik ukiut marlukkaarlugit unammisoqartarpoq, Covid-19-ili pissutigalugu 2020-mi 2022-milu taamaatitsiinnartoqarnikuummat siorna ukioq mannalu AWG-rtoqarpoq.