Arctic Winter Gameseqataasortatsinni aqqanillit ujamminnattut

Unammeqataasortatta akornanni ippassaq ataasinngornermi ujaminnattut aqqanilissuupput.
januaarip 31-at 2023 09:50
Nutserisoq Hanne Petersen

Arctic Winter Gamesimi unammeqataasortavut unamminerit ullut aappassaaneerneranni tamaviaarnertik maangaannartinngilaat, taakkunanngami ujamminnattut aqqaniliupput. 

Tallimat kuultimik, marluk siilvimik sisamallu bronzemik ujaminnattut Arctic Sportsimi, dene Gamesini Snowboardimilu unammeqataasuupput.

Ippassaq ataasinngornermi ujaminnattortavut 


Kuultinnapput:

- Aqqalu Lukassen, angutit 2004-mi kingornaluunniit inuusut stick pullerneranni.

- Randi Sigurdsen, arnat 2005-imi kingornaluunniit inuusut Arctic Sportsimi two-foot high kickerneranni.

- Vittus Olsen, angutit 2006-imi kingornaluunniit inuusut snowboarderlutik rail jamerneranni

- Steffen Knulst, Arctic Sportsimi headpullernermi 
 

- Minik Platou, angutit stick pullerneranni

 

Siilvinnapput:
 

- Nicas Clasen, angutit 2005-imi kingornaluunniit inuusut Arctic sportsimi triple jumperneranni
 

- Steffen Knulst, angutit Arctic Sportsimi triple jumperneranni

 

Bronzennapput:
 

- Randi Sigurdsen, arnat 2005-imi kingornaluunniit inuusut Arctic Sportsimi Triple jumperneranni
 

- Inuuteq Josefsen, angutit Arctic Sportsimi Triple Jumperneranni
 

- Oleeraq Schmidt, angutit 2006-imi kingornaluunniit inuusut snowboarderlutik rail jamerneranni

- Inuuteq Josefsen, Arctic Sportsimi headpullernermi

15-inik ukiulik Ilulissaneersoq, Aqqalu Lukassen, inuusunnerit Dene Gamesimi ippassaq ataasinngornermi stick pullerneranni ajugaagami kuultinnappoq.

Stick pullerlutik unammisut marluusarput, taakkulu tununngaatigalutik sanileriillutik qisumineq amitsukujooq amuniuuttarpaat. Qisumineq amuniuussutaat tanitaasarmat pujattarpoq.

Aqqalu Lukassen ajugaaniutiveriitsiartoq oqaloqatigaarput. Ajugaanissi ilimagisimannginnamiuk ajugaanini nuannaarutigeqalugu, taanna oqarpoq.

- Nuanneqaaq. Amuniuunneq pikkorluffigilaarakku stick pullernermi kultinnannissara ilimaginikuunngilara, sungiusarluarnikuul-luguli. Iluatsippoq, taanna oqarpoq.

Two-foot high kickimi kuultinnattoq

Arctic Sportsimik unammisut Dene Gamesimik unammisut eqqannguanniipput. Arctic Sportseqataasortavullu aamma ujaminnattortaqarput. 

13-inik ukiulik Ikerasammeersoq, Randi Sigurdsen, Aqqalu Lukassen ajugaariitsiartoq two-foot high kickimi aamma ajugaagami kuultinnappoq. 

AAMMA ATUARUK Assit takukkit: Arctic Winter Games aallartilluartoq

Randi Sigurdsen ajugaagami sungiusaasuminit iliminillu unngussaalluni eqitaaneqarami killitsisimaartoq ersarippoq. 

- Nuannaaqalungalu ajunngeqaanga, taanna KNR-imut ajugaareerluni oqarpoq. Taassuma ajugaanissi ilisimagisimanngilaa. 

Two-foot high kick Arctic Sportsimi timersuutinut ilaavoq, Two-foot high kickertullu puisip amianik arsaaraliaq nivingasoq nissuni katillugit pissilluni isigamminniartarpaa.