Tilluuttartoq Nuummi unamminermi kingorna napparsimmavimmut unitsinneqartoq
Tusakkat kingulliit malillugit, tilluuttartoq Qaqortumeersoq eqqumavoq aamma ajunngilaq, Qaqortumi tilluuttartut klubbiat BK Qaqortoq nalunaarpoq.
Angut 18-nik ukiulik ajoqusernerminit ajunnginneruvoq, ajoquserneqarneratali nalaani isiginnaartut aaqqissuisullu attortissimapput tupatsinneqarlutillu.
- Unamminerit peqataaffigisarsimasakka tamaasa eqqarsaatigalugit siullermeerlutik unammisoqartillugu iluatsitsisoqartarpoq, kisianni soorunalimi ajutoortoqarnera ajuusaarnarpoq. Tilluuttartoq taassumalu ilaqutai misiginneqatigaakka, John Pedersen tilluuttartut Nuummi timersortarfissuarmi Godthåb Hallenimi unammineranni aqutsisuusoq oqarpoq. Pisimasoq pillugu unnuaq naallugu attortisimavunga. Tilluunnermi peqataasut tamaasa akisussaaffigaakka taamaattumik attorteqqavunga, John Pedersen oqaluttuarpoq ilassutigaalu tilluulluni unamminermi ajoquserneq ilimagineqarsimanngitsoq.
AAMMA ATUARUK Islandimiut ajugaaffiginissaat Fight Club Nanup neriuutigaa
Tilluuttartut tamarmik nakorsanit tallimanngormat, tassa unammineq ullormik ataatsimik sioqqullugu, misissorneqarput, tilluuttartorlu 18-nik ukiulik unammeqataasussallu tamarmik tilluunnermi unamminissamut peqataasinnaanerannik nalilerneqarput.
Tilluuttartut oqimaannerit unammineranni angutip inuusuttup Qaqortumeersup aamma tilluuttartup inuusuttup Islandimeersup unammineranni ajoqutaasinnaasunik takussutissaqanngilaq.
Tilluuttartoq Qaqortumeersoq siullermeerluni unammivoq. Islandimeersoq marloriarluni unammisimavoq tamaasalu ajorsarfigalugit. Unamminerup ingerlanneqarnerani tilluuttartup Qaqortumeersup ajorneranik takussutissaqanngilaq. Qinngamigut aakkaluarluni allanik ajortunik malussartoqanngilaq.
- Unamminerup immikkortuata aappaata ingerlanneqarnerani tilluuttartup Qaqortumeersup qinngamigut tillunneqartarnera maluginiartorujussuanngorpara. Tilluuttoqartillugumi tamanna nalinginnaasuuvoq John Pedersen oqarpoq.
Immikkoortut pingajuata naammassingajalernerani tilluuttartup qinngamigut aannera sakkortusivoq taamaalineranilu John Pedersenip aaviarpaa, tilluuttartullu ingerlaqqissinnaanini ussersorluni nalunaarutigaa.
Tilluuttartup qinngamigut aannera uninngimmat, tilluuttunut aqutsisup tiilluuneq unitsippaa, tilluunnerup immikkoortuata pingajuata naammassineqarnissaa 10 15 sekundinik sioqqullugu.
Tamatuma kingorna tilluullutik unammisut unammiffiup qeqqanut pisinneqarput ajugaasorlu nalunaarutigineqarluni, taamaalinerani ajortoqartoq tilluunnermi aqutsisup maliginiarpaa.
Nuummi tilluuttartut klubianni Fight Club Nanumi siulittaasoq Kristian Kilime piaartumik qisuariarpoq nakorsarlu tilluuttut unammiffigisaannut aggersarlugu.
- Soorunalimi tilluuttut unammiffigisaanniittut aamma isiginnaartut tupapput, susoqarneranik erseqqissumik paasisaqannginnamik.
AAMMA ATUARUK Tilluuttartut Qaqortoq tiguarpaat
Tilluuttartoq Qaqortumeersoq ilisimajunnaanngilaq, kisianni pissusissarinngisaminik pissusilersorpoq sajuttuinnanngorlunilu taamaalineranilu nakorsap aalajangerpaa ambulancenit SANA-mut ingerlanneqassasoq, John Pedersen oqaluttuarpoq.
Unamminermi akisussaasutut John Pedersen nakorsamik oqarasuaatikkut oqaloqateqarpoq. Nakorsaq taanna unamminermi najuuppoq. Taassuma erseqqissumik nalunaarutigisinnaasimanngilaa tilluuttartup ajoquserneranut sunarpiaq pissutaanersoq.
- Tilluuttartoq annertuumik ajoqusersimavoq maannali ajoquserneranit ajunnginneruvoq, John Pedersen oqaluttuarpoq.
Kristian Kilime, Nuummi tilluuttartut klubbianni Fight Club Nanumi siulittaasup, Danmarkimi suleqatigisartik, Palle Kaiser, Danmarkimi tilluuttartut kattuffianni Dansk Amatør Bokseunionimeersoq ajoqusertoqarnera pillugu oqarasuaatikkut attavigivaa.
Tilluunnermi paasissutissat Fight Club Nanup pigisai tunniunneqartut aallaavigalugit, Palle Kaiserip unammineq pissusissamisut ingerlanneqarsimasutut nalilerpaa.
Tilluuttunik unammisoqarnerani piumasaqaatigineqartutut unamminerit nalaanni nakorsat marluk najuupput, tamatumalu saniatigut nakorsat sulinerat nakorsanngornianit aamma malittarineqarpoq.
