Nuannanneq isiginnaartullu illersuilluartut - VM-imut anngunniunneq sorpassuarnik misigisaqarfiuvoq

Pingasut nunanut allanut aatsaat unammeqataapput, pingasut qaperneqarput, isiginnaartunit tapersersorneqarluarput bronzemillu angerlaassillutik.

Eqqartorneqartut tassaapput angutit assammik arsarlutik nunanut allanut unammisartut Mexicomi VM-imut anngunniuteqqammersut.

Naak bronzennanneq VM-imut anngunnissamut naammanngikkaluartoq puigunaatsunik misigisaqarfiusoq, unammeqataaqqaartoq oqaluttuarpoq.

- Nuannersuaarpoq peqataaqqaarluni aamma ilagisagut qiimallutillu tunniussaqarusukkamik, nassuiagassaarpianngilaq nuannisaarsuaarpugut, målmandi Suersaq Bohm Nathanielsen siullermeerluni nunanut allanut unammeqataasoq oqaluttuarpoq.

- Sakkortunaagaqarpunga, ingammik Cubarmiut taakkua eqqoriaruminaatsikkuminaatsittorujuunikuuakka, aatsaammi taama sakkortutigisunik unammigama, taanna oqarpoq.

Pissanganaqisoq

Unamminerit naligiiffiusaqattaarmata arsartut isiginnaartullu pissangasaqattaarput. Tamannalu Hanne Kristiansenip uppernarsarsinnaavaa.

Taassuma ernini Kuutak K. Olsen, Ilulissaneersutulli Suersaq Bohm Nathanielsenitut aatsaat nunanut allanut unammiartoqataarngaartoq tapersersoriartorlugu isiginnaariarpoq.    

VM-imut anngunniunneq naammassimmat ujamminnatitsisoqareernerani Hanne Kristiansenip ernini, Kuutak K. Olsen, aatsaat nunanut allanut unammiartoqataasoq paninilu ilagalugit tulluusimaartut. Assi © : Hanne Kristiansen

- Isiginnaakkagut nuanneqaat, pikkunaqaat pissanganaqaat isiginnaarlugit. Isiginnaartuuinnarluni nukkiornaqaaq aamma.

- Nuannaalerutta, nikallorutta kamalerutta misigissutsit tamaasa atortarpagut, taanna Mexicomit aallalersoq Facetimekkut KNR-imit oqaloqatigineqarnermini oqarpoq, taanna oqarpoq.

Qaperneqartut

Hannep kalaallillu allat tapersersuiartornerat isiginnaaraangamillu nilliasarneri unammeqataasut iluaqutigilluaraat malugineqarpoq.

- Unammeqqaarmata siullermik nilliakuloornaveersaarluta ingattajaarnaveersaarpugut, kisianni malugigatsigu qanoq qiimmassaatigisaraat nilliasarnerput tapersersuisarnerput, taava immitsinnut killilersorunnaarpugut nilliasarnitsinnut, Hanne Kristiansen oqarpoq.

Unammeqataaqqaartut pingasut qapeqqallutik angerlatut uterfigeriartigit. Nunanummi allanut unammiartoqqaartut qapertittarnerat ileqquusarpoq. Unammisaqattaarnerillu aallartinngilaarneranni pingasut qapertipput.

Suersaq Bohm Nathanielsen qaperneqartut ilagaat.

- Nuannersumik aamma qapertippugut, ilaatigut nuanniigusuttoqaraluartoq kisianni qaangiuttarpoq, taanna oqarpoq.