Timersorneq

Nunarput anngunniulluni unamminermi bronzennattoq

Kalaallit angutit pissanganarluinnartumik unamminermi 29-25-mik ajugaapput, taamaalillutillu bronzennallutik.

Allattoq Hanna Vestergaard Hviid

maajip 13-at 2024 11:05

Angutit assammik arsartartut nunarsuarmi pissartanngorniunnissamut Mexicomi sapaatip akunnerata siuliani anngunnipput. Nunarput USA-mut unamminermi ajorsareerluni – aamma USA-mut unammeqqilluni bronzennanniartussaavoq.

Kalaallit Assammik Arsartut Kattuffiat tusagassiuutinut nalunaarummi allappoq.

Nunarput USA-lu ippassaq pissanganarluinnartumik unammipput.

Nunarput USA-lu unamminerup immikkoortuani siuarsimaniarlutik sukataarput, USA-pingasunik siaqqariarluni ataatsimik kinguaqqalerpoq.

Nunarput unamminerup immikkoortuani siullermi 15-12-imik ajugaavoq.

Aamma atuaruk VM-mut anngunniunneq: Kalaallit Nunaat USA-mut ajorsarpoq

USA-li unamminerup aappaani sukataaqqippoq, unammisullu taamaalillutik 22-22-mik naligiilerlutik.

Naalli unamminermi marloriarluni team timeoutertoqaraluartoq USA-p kalaallit unammisartut ajugaaffigisinnaanngilai, kalaallillu 29-25-mik ajugaallutik.

Steen Kleist Møller unamminermi arsarluarnerpaatut toqqagaavoq.

Kalaallit assammik arsartartut marluk tassa Milan Olsen aamma Minik Dahl Høegh unammisaqattaarnermi All Star Teamimut toqqarneqarput.

- Angutit, angusassinnik pilluaritsi. Sisamanngorpat nunatsinni takuss, Assammik Arsartartut Kattuffiat tusagassiuutinut nalunaarummi allappoq.