Savalimmiunit immuk nunatsinni assammik arsarnermi sungiusaasoqarlersitseqqinnissamut qulakkeerisoq
Assammik arsartartut kattuffiata TAAK-ip arnanut nunanut allanut unammisartunut sungiusaasut marsimi soraarsippai. Tamanna kamaatigineqarpoq, arnammi nunatta ukiuni 20-ni nunarsuarmi pissartanngorniuteqataaffigisimanngisaanni decembarimi unammeqataapput.
Maannali nutaanik sungiusaasoqalerpoq. Tamanna savalimmiormiut immuliorfiata MBM-ip nunatsinnut aamma nioqquteqartartup ikiuunneratigut pivoq.
TAAK tusagassiuutinut nalunaarummi allappoq.
- Kattuffimmiit nuannaarutigeqaarput sungiusaasunngortut nutaat ilisaritissinnaagatsigit, Mikkel Bom aamma Kim Ostermann-Petersen. Taakku marluullutik isumaqarput nunanut allanut unammisartussatut piukkunneqartut qaffasinnerusumut ingerlatinneqassasut, TAAK-imi siulittaasoq, Carsten Olsen oqarpoq.
Mikkel Bom DHF-imi (Dansk Håndbold Forbundimi aaqq.) divisionini aammalu piukkunneqartuni sungiusaasutut naammassinikuuvoq, ilaatigullu Team Esbjergimi sungiusaasuni akuusimalluni. Taamaasillunilu TAAK-mi nunanut allanut unammisartuni piukkassanillu Jakob Larsen siuttoralugu aallarnerneqartumi ineriartortitsinermi nutaami suliaqarnermi pingaaruteqalertussaavoq.
Kim Ostermann-Petersen sungiusaanermi ikiorti arnat nunanut allanut unammisartut sungiusaasuisa marsimi soraarsinneqartuni ilagaat, taanna maanna atorfimminiileqqissaaq.
Savalimmiunit qisuariapallattoqarnera
TAAK aningaasaqarnikkut eqqugaammat savalimmiormiut suliffeqarfiat sukkasuumik attaveqapallassimasoq, Carsten Olsen oqarpoq.
Taassuma oqarnera naapertorlugu suliffeqarfiup TAAK-ip suliniutaanut tapersiinissaa periarfissatsialaallunilu nunanut allanut unammisartut savalimmiormiut immutaannik ersarinnerulersitsissapput.
Taakkulu CEO-mit Hákun Steingrímssonimit taperserneqarpoq:
- Maani Savalimmiuni sapaatip akunneranut ataasiarluta kalaallit nutaarsiassaatat takusarpagut. Nutaarsiassarlu nuanninngitsoq takkuteriarmiat, nunanut allanut unammisartut pillugit sukkasuumik qisuariarpugut. Tamanna tamatsinnut iluaqutaasinnaasutut nalilerneqarsinnaavoq.
- Soorunami Kalaallit Nunaanni pisiassaateqalernissarput aallartikkusupparput, imminermilu tulluusimaarutissaalluni arnat nunanut allanut unammisartunut aningaasaliinermi anersaartortilaarsinnaallugit, taanna tusagassiuutinut nalunaarummi oqarpoq.
Sungiusaasoq qilanaartoq
Mikkel Bom sungiusaanermi siuttutut sakkussaqarluartitsilernissamut klubbinilu sungiusaasunik ilinniartitsinissamut aallartitsilluarsinnaanissaa TAAK-ip naatsorsuutigaa. Taamaalillunilu piginnaasalinnik siusissumi ineriartortitsisoqarsinnaalissalluni.
Sungiusaasunngortorlu aamma qilanaarpoq.
- Nunanut allanut unammisartuunermi suliassamut qilanaaqaanga unammisartullu killiffissamut tullermut kivinnissaannut. Aammalu Anders Kim-illu annertuumik suliarisimasaat nangeqqinnissaat.
Piukkussanik ineriartortitsinermi arsartunik ineriartortitsinerinnaanngilaq, assammik arsarneq aqqutigalugu inuttut ineriartortitsinerussaaq, taanna oqarpoq.
TAAK arpannerup nukittorsaanerullu tungaatigut sammisaqarniarpoq, tamanna niviarsiaqqanut U18-inut Kinamut aggustimi nunarsuarmi pissartanngorniuteqataasussanut maanna misilerarneqaleruttorpoq.
