Tilluuttartut Qaqortoq tiguarpaat
Sungiusaatigalu unamminerit pingasut aliikkutaralugulu tilluuttartut qulingiluat tilluutissapput.
Tilluuttartut 18-it unammissapput - tilluuttartut peqatigiiffiinit marlunnit peqataaffigineqassalluni, Tassalu Qaqortumi tilluuttartut klubbiat BK Qaqortoq aamma Nuummi tilluuttartut klubbiat Fight Club Nanoq.
Tilluuttoqarnerani tilluuttartut aqutsisuannik Danmarkimeersumik tikisitsisoqassaaaq - taassuma nunat tamat maleruagassaat nutaat klubbinut ilinnniartitsissutigissagai, BK Qaqortoq tusagassiuutinut nalunaaruteqarluni allappoq.
Nunatsinni tilluuttartut klubbii tallimaapput. Nuummi, Qaqortumi, Sisimiuni, Ilulissani Nanortalimmilu tilluuttartut klubbeqarput. Taakkualu tamarmik qaaqquneqarmata, Tilluuttartut Nuummeersut peqataaniarlutik nalunaarsimapput.
Tilluuttartut klubbii allat pilersinneqaqqammernertik unamminissamullu piareersimannginnertik pissutigalugu peqataasinnaanatik nalunaarput aamma aningaasatigut inissisimanertik ajornartorsiutigalugu peqataasinnaanatik.
- Fight Club Nanoq Nuuk aamma Qaqortumi tilluuttartut klubbiat BK Qaqortoq tilluuttarnerit pillugit qanittumik ajunngitsumillu suleqatigiipput, tamatumalu illoqarfinni allani nukittorsarneqarnissaa anguniarneqarpoq - nuna tamakkerlugu kattuffinngornissaq oqaluuserineqarmat nunatsinni timersortartut kattuffiata ataani immikkoortaqarfeqalernissaq siunertarineqarluni. Kattuffinngornissamut ikinnerpaamik klubbit tallimaanissaat piumasaqataavoq - tamannalu maanna anguneqareermat kattuffinngornissaq siunissami suliniutiginiarparput, Qaqortumi tilluuttartut klubbiat BK Qaqortoq tusagassiuutinut nalunaarummini allappoq.
