Kalaallit niviarsiaqqat isikkamik arsartartut nunat tamalaat unammiuaarneranni peqataassasut

Dana Cup 2024 Hjørringimi juulip naanerani aaqqissuunneqarpat arsamik ingerlatsisoqarlunilu pakkersimaarisoqassaaq.

Nuummi klubbimit B-67-imit niviarsiaqqat holdii marluk ukioq manna peqataasut ilaanniissapput.

Arctic Import aam Hørkram Foodservice ataatsimoorlutik aningaasaliineratigut niviarsiaqqat unammigiartortinneqarsinnaapput. Ingerlatsiviit marluk ataatsimoorlutik tusagassiuutinut nalunaarummi allapput.

- Dana Cup aningaasaliinerput aningaasaliineruinnanngilaq. Ataatsimoornermik pitsanngorsaaniarneq periarfissanillu siuarsaaniarneq pingaarnertut naleqartitatta ilagaat, Arctic Importimi tuniniaanermut pisortaq, Henrik Kronborg oqarpoq.

Ingerlatsiviit marluk tamarmik Naalagaaffiit Peqatigiit nunarsuarmi timersornermi naligiissitaanermik siuarsaaniarnermut anguniagaannik suliaqaqataanerat ataatsimoorlutik aningaasaliinerannut pissutaavoq.

Ataqqinninneq, naligiissitaaneq ikinngutigiinnerlu

Dana-Cup danskit timersornermi aaqqissuuttagaanni annerpaavoq, tassanilu nunanit tamalaanit isikkamik arsarnermi unammiuaartoqarpoq, nunanit 45-t missaannit holdit 1000-it missaanniittut peqataasarput. Aaqqissuussisut nittartakkaminni allapput.

Aningaasaliisoqarnerata niviarsiaqqat isikkamik arsarnermi ataqqinninnermik, ataatsimoornermik, naligiissitaanermik ikinngutigiinnermillu avatangiiseqartumik aallussaqarsinnaatikkai, suliffeqarfiit tusagassiuutinut nalunaarummi allapput.

Hørkramimi pisortap anignaasaliineq inuiaqatigiinni aallussinermik aamma takutitsissasoq oqaatigaa.

- Dana-Cupimut inuusuttullu takorluugaqarnerannut aningaasaliinerput innuttaaqatigiinnermi akisussaassuseqarnermut inuiaqatigiinnilu aallussinitsinnut ersarissumik takutitsivoq.

Aningaasaliinermi niviarsiaqqat isikkamik arsartartut unammigiarneranni najugaqarnermut nerisaqarnermullu aningaasartuutissaannik tamanik matussusiineq ilaavoq.