Timersortartut peqatigiiffiisa kattuffii: Sipaaqqissaarluta ingerlatsivugut

Nunatsinni timersortartut timersuutinik assigiinngitsunik aallussisinnaanissaannut peqatigiiffiit aningaasaateqartariaqarput, taakkuli aningaasarliorput. 

Timersortartut peqatigiiffiisa kattuffii ingerlalluarput, kattuffiilli arlallit aningaasaqarniarnerat ineriartornermut malinnaasinnaanngimmat pilersaarutit pingaarnersiorneqartariaqartarput. 

Pikkorivissunik ineriartortitsineq timersoqatigiiffiit kattuffiinut akisuvoq, taakkuninngami angalatitsinerit pissartanngorniuutitsinerillu aningaasartorfiungaatsiartarput. 

- Aningaasaliissutit naammannginnerat peqqutigalugu periusissiatsinnik allannguisariaqarnissarput pilersaarutittalu affaannaannik piviusunngortitsisinnaasariaqalernissarput ajuusaarnassaaq ajornartorsiutaassallunilu. Taamaammat timersuutini assigiinngitsuni VM-ini aamma peqaataatitsisinnaanissatsinnut aningaasanik nassaarnissarput neriuutigaara, Elite Sport Greenlandimi siulittaasoq Nikolaj Christoffersen oqarpoq. 

Elite Sport Greenland kattuffiuvoq Namminersorlutik Oqartussat suleqatigalugu nunatsinni timersortartut pikkorivissut nunani tamalaani unamminerni peqataasarnissaannik siuarsarnissaannik nunarsuarmiunullu naleqqussarnissaannik suliniuteqartoq. Aningaasaliissutit Namminersorlutik Oqartussaneersut, Tips- og Lottomidlerineersut aningaasaliissutillu kattuffimmit aqunneqarput. 

Kattuffiup aningaasaqarniarnera ukiuni kingullerni allanngungaarsimanngilaq, Elite Sport Greenlandimillu aningaasaliissutaasartut aamma allanngungaarsimanatik. Nunatsinnili timersortartut pikkorissutsimikkut inissisimanerat allanngorsimavoq. 

- Timersortartut amerlanerujussuit peqataasalerput. U18-it U21-llu peqataasarput arnartaqarput angutitaqarlutillu. Tamanna pikkorivissunik ineriartortitsinerup ingerlanneqarnerata aningaasatigut malinnaavigiuminaannerulerneranik kinguneqarpoq, Nikolaj Christoffersen oqaluttuarpoq. 

Ilaasortat amerlisut 

Timersortartut peqatigiiffiisa ilaasortaat ukiuni kingullerni, ukiut tamaaa amerlisarlutik ataatsimut isigalugit amerligaluttuinnarput.

Timersortartut peqatigiiffiisa ilaasortaat 2019-imi katillugit 8.858-iupput, 2023-milu 9.671-inut amerlisimallutik. 

Kalaallit Nunaanni Volleyballertartut Kattuffiata (KVK) ilaasortai ukiuni kingullerni tallimani amerlisimagaluartut, ilaasortat 340-t suli ikippallaarnerat kattuffimmut unammillernarpoq.   

- Aningaasaqarnerput tamaat isiginiartarparput. Sipaarfigisinnaasagut tamaasa sipaarfigisarpagut atugassagullu nalilersoqqissaartarlugit, KVK-mi aningaaserisoq Karl Ole Petrussen oqarpoq. 

Kattuffik ilaasortaqarnerulernissamik suliniuteqarpoq siunissamullu pilersaaruterpassuaqarluni, soorlu 2027-mi Island Gamesimi peqataanissaq ujaminnannissarlu kissaatinut ilaasoq. 

-Politikerit aningaasaliinerulaartalernissaat siulersuisut angorusukkaluarpaat. Volleyballertarnerulli nunatsinni annertuneruleqqinnissaa atugaanerulernissaalu suliniutigaarput, Karl Ole Petrussen oqaluttuarpoq. 

Aningaasarliorneq ilaatigut aamma peqqutigalugu timersortartut peqatigiiffiisa kattuffii pingasut ukioq manna marsimi Arctic Winter Gamesertoqarnerani (AWG) peqataasinnaanatik nunatsinniiginnarput. 

Greenland Table Tennis Federationip (GTTF), Kalaallit Nunaanni Volleyballertartut Kattuffiata (KVK) aamma Kalaallit Arsaattartut Kattuffiata (KAK) ilaasortatik peqataatinngiinnarpaat. 

Pikkorivissut aallunneqarnerussapput

Timersortartut peqatigiiffiisa kattuffiata ilaat Badminton Kalaallit Nunaat (BKN), nunarput sinnerlugu Arctic Winter Gamesimi peqataatitsisarpoq, ukioq manna aamma taamaaliorput. 

- AWG-mi peqataasut amerlanerunissaat uatsinnut piumasaralugu naalakkersuisut oqartuartarput. AWG-mi peqataaneq nammineq akiligassaraarput, tassungali aningaasaliineq uatsinnut amerlanernik aningaasaliinertut aaqqiissutaasinnaavq, BKN-imi siulittaasoq Michael Kleist oqarpoq. 

Timersortartullu peqatigiiffiisa kattuffiisa susassaqartitsinerat naleqartoq BKN-imi aamma malugineqarsinnaavoq. 

BKN-imimi ilaasortaminnik pikkorivissunik ineriartortitsinermut aningaasanik amerlanernik aamma perusukkaluarput. 

 - Allatulli pikkorinnerulerusuppugut, pikkorinnerulissaguttalu sanillersuussinnaasariaqarpugut taamaammallu pikkorivissunik ilaqartariaqarpugut, Michael Kleist oqarpoq. 

Timersoqatigiit Assammik Arsartartut Kattuffiata (TAAK) aamma aningaasanik amerlanernik tuneqqullutik politikerinut oqariartuuteqarnerat allaaserereerparput. 

Taakkulu siulittaasuata nunatsinni pikkorivissunut aningaasaliinerunissaq aamma angorusukkaluaqaa. 

- Aningaasamininnguit naammanngillat. pikkorivissunik ineriartortitsineq annertuumik aningaasaliivigineqartariaqarpoq. Assammik arsartartut kisimik pisiariaqartitsinngillat, TAAK-p siulittaasua Carsten Olsen taama oqarpoq. 

Tulluusimaalersitsisarpoq

Pikkorivissortaqarnitta misigissutitsinnut nanutullu ataatsimoortutut misiginitsinnut pingaaruteqarnera Elite Sport Greenlandip erseqqissarpaa. 

- Pikkorivissunik timersortartoqarneq pingaaruteqarpoq, taakkumi aqqutigalugit immitsinnut nunanut allanut nittarsaattarpugut, erfalasorput nittarsaattarparput tulluusimaarnerulertarlutalu. Taakku aqqutigalugit aamma nunatut ataqatigiinneq annerulertarpoq, Nikolaj Christoffersen oqarpoq. 

Nunatullu ataqatigiinneq misigisanik immikkuullarissunik inuiaqatigiinnilu ataatsimuussusermik pilersitsisarpoq. 

- Nunani tamalaani unammisarfinni assorooraangatta timersornikkut allatut aamma angusaqartarpugut. Angerlarsimaffitsinniit malinnaasarpugut timersortartortagullu nunarput sinnerlugu assoroortut tulluusimaarutigisarlugit. Pikkorivissortaqarnikkut tamakku ilaatigut anguneqartarput. 

Politikerit aningaasaliinerunissaat tusarfiit tamarmik ujartorpaat. Taakkununnga akissutitut timersornermut naalakkersuisup Aqqaluaq B. Egedep apersorneqarnermini qisuariaataa ulluni aggersuni saqqummiutissavarput.