Innarluutillit arsaattarnerat B-67-ip aallartilerpaa
Arsaattartut peqatigiiffianni B-67-mi kapitali nutaaq sapaat novemberip 24-at aallartissaaq.
Tassanimi siullerpaamik aallarniutigalugu meeqqat inuusuttuaqqallu 15-it tikillugit ukiullit arsaannermi sungiusartarnerat aallartissaaq.
Aallartitserusunnermut tunngaviusoq pissartanngornermi nutaamik anguniagaqarnermiinngilaq.
- Nuannertuaannarpoq meeqqanut inuusuttuaqqanullu tunniussaqarneq pingaartumik meeqqat inuusuttuaqqallu ajornartorsiortut allatigullu neqeroorfigineqarpianngitsut eqqarsaatigalugit, B-67-mi arsaannermut immikkoortortami siulittaasoq Jimmy Holm Jensen oqarpoq innarluutillit arsaattarnerannik aallartitsilernerat KNRip oqaaseqarfigeqqummagu.
- Kalaallit Nunaanni arsaannermi peqatigiiffiit anginersarinnguatsiarpaatigut assigiinngitsutigullu siuttoorusuppugut – soorlu innarluutillit arsaatsittarneranni, Jimmy Holm Jensen itisiliivoq.
Nutaamik aallartitsinissaq sioqqullugu innarluutillit oqaaseqartartut Anja Hynne Nielsen aamma oqaloqatigineqarpoq. Taassuma aamma ujartorpaa innarluutillit timersornissamut periarfissaqarnerunissaat.
Meeqqat angajoqqaallu ataqatigiissut
Pisoq B-67-mut aamma nutaajuvoq. Taamaattumik peqatigiiffiup sungiusaasui kalaallisut oqartarnerput malillugu torrutiinnarlugu taamatut sungiusaanermut ilinniassapput.
- Aallarniutigalugu nammineq ingerlateriikkatta iluaniit sungiusaasoqassapput. Taava paasinarsiartorumaarpoq innarluutilinnut immikkoortortatsinni kikkut ingerlatsisuujumaarnerat, Jimmy Holm Jensen oqarpoq.
Sungiusarneq siulleq sapaatiuppat Kangillinnguit Atuarfiata eqaarsaartarfiani pissaaq. Pisussarlu nutaarluinnaammat qanoq ilimasuuteqarnissaq nalorninarsinnaavoq.
- Neriuppunga nuannaarnermik ataatsimoornermillu misigitissinnaassallugit. Ilimanarpoq meeqqat innarluutillit allatut periarfissaqartiginngitsut peqatigiiffinnut ilanngullutik allat assigalugit timersortalernissamut.
- Neriuppunga manna aqqutigalugu taamatut periarfississinnaassallugit. Aamma angajoqqaat eqqarsaatigalugit immaqa kiserliortutut misigisartut mannalu aqqutigalugit angajoqqaat allat issiaqatigalugit oqaloqatigiillutillut avitseqatigiissinnaassammata. Aamma isumaqarpunga meeqqanut allanut akuliunneq pitsaasuusoq taamaasilluni timi tarnerlu pissarsitillugit, Jimmy Holm Jensen oqarpoq.
