Nerrivimmi arsaarartartut volleyballertartullu Arctic Winter Gamesimut peqataanngiinnassasut
Kalaallit nerrivimmi arsaarartartut siorna Arctic Winter Gamesimi angusarissaarluavipput.
Taakkumi Canadami unammiuaartoqareernerani ulunik aqqaneq-marlunnik kuultinik pingasunillu sølvinik ujammerlutik nunatsinnut tikipput.
Ukioq mannali taamaattoqassanngilaq.
Nunatsinnimi arsaarartartut kattuffiat, Greenland Table Tennis Federation (GTTF), Alaskami ukioq manna Arctic Winter Gamesertoqalerpat peqataatitsiniarani aalajangerpoq.
Kalaallit Nunaanni Volleyballertartut Kattuffiattaaq unammiartortitsissanngilaq.
Alaskamummi angalanissaq akisuallaassasoq GTTF-ip siulittaasua, Henrik Ottosen oqarpoq.
- Unammisartuutitta angalatinnissaat uagutsinnut akisuallaarpoq. Kingullermik Arctic Winter Gamesimut peqataatitsigatta millionit affaangajaannik aningaasartuuteqarpugut, aningaasaqarnitsinnullu equsoortitsinikuuvoq. Taamaasilluta siulersuisuni oqaloqatigeereerluta ukioq manna peqataatitsiniarata aalajangerpugut, taanna oqarpoq.
Kalaallit Nunaanni Volleyballertartut Kattuffianni (KVK) siulittaasoq, Nukannguaq Ostermann aamma taama oqarpoq.
- Naatsorsuutigisagut malillugit 300.000 - 400.000 koruunit missaani tassunga angalanerinnarmut atortussaavagut. Taamaammat peqataatitsinissarput imminut akilersinnaasorisimanngilarput.
Kalaallit siorna Arctic Winter Gamesimi peqataammata Air Greenland pingaarnertut aningaasaliisuuvoq, taamaalilluni timersortartut, sungiusaasut allallu nunarput sinnerlugu peqataajartortut nunatsinniit Canadamut angalanerat taperneqarluni. Kalaallit Nunaanni Timersoqatigiit Kattuffiatali Air Greenlandimik ukioq manna aningaasaliinissamik isumaqatigiissusiorniarnera iluatsinngilaq.
Unammiuaarnerit allat misissorneqartut
Timersorluni misigisassanut aningaasat aporfiunerat GTTF-ip siulittaasuata Henrik Ottosenip uggoraa. Inuusuttuttaaq timersortartut taama misigisut siulittaasoq oqarpoq.
- Meeqqat oqaloqatigilaareerpakka, peqataasinnaajunnaarnertillu uggoraat. Aammali paasinnipput, taanna oqarpoq.
Arctic Winter Gamesimili aamma unammisassat piginnaasaat appisippallaassasut taanna isumaqarpoq, Europamilu unammiuaarnerit allat GTTF-ip misissorniarpaa, kalaallimmi nunani allanit assigiinngitsuneersut unammilluarnerusinnaassammatigit.
KVK-p aningaasat nunatsinni atorusunnerugai siulittaasoq Nukannguaq Ostermann oqarpoq.
- Siunissami qanoq ingerlanissarput siulersuisuni ataatsimeersuarnitsinni kingullermi oqaluuseraarput, aningaasallu sungiusaasunik pikkorissaanissamut atorneqassasut isumaqatigiissutigaarput. Kissaatigineqartuttaaq ilagaat nunatsinni unammersuartarnerit ajornanngippat amerlanerunisinnaanissaat, taakkualu suliniutigalugit ineriartortitsineq aamma arsartunik inuusuttunillu amerlisaaneq suliniutigissavagut.
Niviarsissat futsalertartut aamma uniinnartut
Nerrivimmi arsaarartartut volleyballertartullu uniinnarmata nunatsinni kattuffiit pingasut ukioq manna Arctic Winter Gamesimi peqataatitaqassanngillat.
Niviarsissammi U-16-it isikkamik arsaattartut aamma uniinnarput. Taakku nerrivimmi arsaarartartut kattuffiattuulli tunngavilersuuteqarput.
- Unammisagut pikkunaappallaassasut nuna tamakkerlugu sungiusaasoq naliliivoq. Tunngavilersuut alla tassaavoq akia. Niviarsissat 13-it Arctic Winter Gamesimut unammiartortissimasuugutsigit 600.000 koruunit sinnerlugit aningaasartuuteqarsimassagaluarpugut. Taamaattumik isumaqatigiippugut unammisitsinerit allat misissorniarlugit Lillehammerimilu periarfissaq nassaaralugu, arsaattartut kattuffianni KAK-mi siulittaasoq Kenneth Kleist oqarpoq.
Taammaattumik niviarsissat isikkamik arsaattartut Norgemi Lillehammerimi unammiuaarnissamut peqataasussanngorput.
