Timersorneq

Niviarsissat futsalertartut AWG-qataanatik Norgemut unammiartuinnalerput

Aningaasartuutit timersornikkullu pissarsiassakinneq tunngavigalugit Arctic Winter Gamesimi peqataanissamut uniinnartoqarpoq.

Allattoq Noah Mølgaard

januaarip 11-at 2024 12:54

Niviarsissat U-16-it isikkamik arsaattartut martsimi Arctic Winter Gameseqarnissaanut uniinnarput.

Taassunga taarsiullugu Norgemi illoqarfik Lillehammer ornissavaat tassani peqatigiiffiit unammitsinneqarnerat kalaallit peqataaffigisussanngormassuk.

Aamma atuaruk Futsalimi AWG-mut piumasaqaat: Pujortartassanngilatit, snusitortarnak imigassamillu atuisuunak

Unammisitsineq taanna tassaavoq Bambusa Cup ukioqqortussutsini arlariinni unammisitsinerusoq.

- Arctic Winter Gamesimut uniinnarnissamik nuna tamakkerlugu sungiusaasorput David Janussen qinnuteqarnikuuvoq unammisassatta pikkunaappallaarnissaat eqqarsaatigalugu, arsaattartut kattuffianni KAK-mi siulittaasoq Kenneth Kleist KNR-mut oqarpoq.

- Tunngavilersuut alla tassaavoq akia. Niviarsissat 13-it Arctic Winter Gamesimut unammiartortissimasuugutsigit 600.000 koruunit sinnerlugit aningaasartuuteqarsimassagaluarpugut. Taamaattumik isumaqatigiippugut unammisitsinerit allat misissorniarlugit Lillehammerimilu periarfissaq nassaaralugu, Kenneth Kleist oqarpoq.

Unammisassat pikkorissut

Maanna unammisartut 13-it toqqarneqareerput januarip 17-aniit Nuummi sungiusaqatigiittussat januarillu 22-at Norgemut aallarlutik.

Futsalimi U-16-ni nunanut allanut unammisartut

1. Bea Jensen B-67 (Målmand)
2. Paarma Kreutzmann Young Guns
3. Regina Ignatiussen ATA (Målmand)
5. Enya Janussen Young Guns
6. Pipaluk Rosing Young Guns
7. Camilla Egede K-33
8. Asine Sanimuinaq ATA
10. Michelle Singertat B-67
11. Niviaq Broberg Berthelsen I-69
12. Julia Pedersen I-69
15. Nivi Fontain IT-79
22. Nukaaka Lynge Young Guns
94. Lara Utuaq Bianco ATA

Sungiusaasoq: David Bror Janussen

Sungiusaasup ikiortaa: Marie-Louise B Berthelsen

- Unammisassavut pikkorissorujussuusut paasissutissat pissarsiarinikuusavut malillugit takusinnaavarput. Norgemi niviarsiaqqat assut pimoorullugit sungiusarneqaramik. Neriuppugut unammillersinnaassallugit ajornanngippallu ajugaasinnaassalluta, Kenneth Kleist oqarpoq.

Ukiorpassuit ingerlaneranni illup iluani arsaannermi kalaallit Arctic Winter Gamesimi peqataasarput. Niviarsissat siullerpaamik 1992-mi peqataapput ukiullu ingerlaneranni angusarissaartarlutik arlaleriarlutillu ajugaasuusarlutik.

2023-mi Arctic Winter Gameseqarmat futsalimi kalaallit aamma peqataatitaqanngillat.