Futsalimi AWG-mut piumasaqaat: Pujortartassanngilatit, snusitortarnak imigassamillu atuisuunak

Arsalerillaqqinneq, arsaannermi paasinillaqqinneq qasujaassuserlu pigissallugit naammanngilaq aappaaga Alaskami Arctic Winter Gameseqarnissaani Nunarput sinnerlugu unammiartussaguit. Aamma peqqinnartumik inooriaaseqartariaqarputit.

Futsalimi nuna tamakkerlugu sungiusaasoq David Janussen taama piumasaqaateqarpoq.

Ukioq manna Arctic Winter Gamesimi futsalertoqarnerani Nunarput peqataatitaqanngilaq. Maannali arsaattartut kattuffiat KAK aalajangerpoq nivissat U-16-it issittormiut unammiuarnerannut peqataajartortissallugit.

Nuna tamakkerlugu sungiusaasoq David Janussen maanna toqqaareerpoq tassanilu peqqinnartumik inooriaaseqarneq pingaartinneqarluinnarpoq.

- Piumasarivara unammisartut pujortartassanngitsut, snusinik atuisuunatik aammalu imigassamik atuisuussanngitsut, David Janussen KNR-mut oqarpoq, nangillunilu:

- Piumasaqaatit taakku assut pingaartippakka. Unammisartut Nunarput sinnerlugu unammiartulerunik meeqqanut inuusuttuaqqanullu maligassiuisuusussaapput,

Paarlatsissat piareersimapput

Arctic Winter Gamesimi arsaqataasussat qulingiluat aappaagu martsip aallartilaarnerani Alaskami unammeqataasussat toqqarneqareerput.

Taakku illoqarfigisaat tassaapput Tasiilaq, Ilulissat, Nuuk aamma Qaqortoq. Sungiusarnerat aamma peqqinnartumik inooriaatsimik malinninnerat illoqarfigisaanni sungiusaasut suleqatigalugit nakkutigineqarpoq.

- Arsartut toqqarneqartut aamma ilisimatinneqareerput piumasaqaatinik malinnissinnaanngikkunik taarserneqassasut, David Janussen oqarpoq.

Niviarsissat U-15-it GM-rnerat malinnaaffigivaa piukkunnartorpassuarnillu takusaqarluni. Paarlatsissamaatit tallimat aamma toqqarneqareerput arlaat pisinnaajunnaassappat piareersimasut.

Nunarput siornatigut futsalimi Arctic Winter Gamesimi peqataasarpoq niviarsiaqqat nukappiaqqallu angusarissaartarlutik.

Siornatigut Arctic Winter Gamesimi peqataasut ilaasa kingorna inersimasuni nunanut allanut unammisartuuneq angusarpaat.