Tasiortap Martha Lund Olsen akissuteqarfigaa

Naalakkersuisut tarnip pissusaanik ilisimasalinnik inersimasunik kinguaassiuutitigut atornerlunneqarsimanerminnik kingunerlutsitsisunik katsorsaajartorlutik angalasartussanik pilersitsinerisigut tamanna pisussanngorpoq.
 
Suliamut tamatumunnga 2013-imi 5,6 millionit koruunit atorneqarput ukiormanna 9,2 millionit koruunit, 2015-imullu aningaasanut inatsisissatut siunnersuummi 12,8 millionit koruunit missingersuutigineqartut, ilaqutariinneermut naalakkersuisuugallartup, Martha Lund Olsenip qanittukkut taama ilisimatitsivoq.
 
Peqatigitillugu erseqqissaatigaa Tasiortamut nunatta karsianit tapiissutitaasartut 300.000 koruuniusut pingaartumik allaffissornermut atorneqartartut.

AAMMA ATUARUK Tasiorta matusariaqalersoq

Taamatullu oqaaseqarnera Tasiortamit pakatsissutigineqarpoq.
 

Ikorfartoqatigiiffimmit erseqqissaatigineqarpoq ikiorneqarusullutk saaffiginnittartut ikiornissaannut ininik sullivissanik aammalu katsorsartittut toqqissillutik sullinneqarnissaannut oqaloqatigiittarfinnik peqarnissaq pisariaqartoq.
 
Suliniutut aaqqissuussaasumik ingerlanissaat pingaartuummat Tasiorta ukiut kingulliit ullup affaanut allaffimmioqartariaqarsimavoq, siulersuisuni ilaasortat imaluunniit piumassutsiminnik sulisut suliffimmik avataatigut aaqqissuusinissaminnut isumalluutigineqarsinnaanngimmata.

AAMMA ATUARUK Martha Lund Olsen: Naalakkersuisut Tasiortap matusussanngorneranut pissutaanngillat

Tasiorta aamma isumaqarpoq ikorfartoqatigiiffiup sulinera inuiaqatigiinnut iluaqutaasimasoq.
 
Ukioq 2013-mi arnat 17-it angutillu 9-t tarnip pissusaanik ilisimasalinnit katsorsarneqarlutik sap. ak. qulini sullinneqarsimapput aamma arnat 16-it ikorfartoqatigiinni psykoterapeutimit ingerlanneqartumik Tasiortami naapisinneqartarsimallutik.  
 
Taakku saniatigut oqarasuaat 141-kkut sianerlutik siunnersorneqartartut 61-iusimapput, Tasiorta Martha Lund Olsenimut akissuteqarluni taama allappoq.