Martha Lund Olsen: Naalakkersuisut Tasiortap matusussanngorneranut pissutaanngillat
Peqatigitillugu aamma erseqqissaatigaa eqqunngitsuusoq oqassalluni Naalakkersuisut Siumumit siuttuuffigineqartut Tasiortap suliaminik unitsitsisariaqarneranut pisuusut.
Martha Lund Olsenip aamma erseqqissarpaa nammineq Ilaqutariinnermut Naalakkersuisutut, inersimasut meeraanerminni kinguaassiuutitigut atornerlugaasimanertik pissutigalugu kingunerlutsitsisut katsorsarneqartarnerat aallartissimagini. Tamannalu tarnip pissusianik ilisimasalinnik angalatitsisarnissamut aningaasaliisoqarneratigut pisimavoq.
AAMMA ATUARUK Tasiorta matusariaqalersoq
Suliamullu tamatumunnga siorna 5,6 millionit koruuninik ukiormannalu 9,2 millionit koruuninik aningaasaliisoqarpoq aamma aappaagumut aningaasanut inatsisissatut siunnersuummi 12,8. millionit koruuninik immikkoortitsisoqarluni.
Tasiortamut aningaasaliissutit siorna 400.000 koruuniusut ukiormanna 300.000 koruuniupput.
- Tasiorta peqatigiffiuvoq namminerisaminik ingerlasoq Nunattalu karsianit tapiiffigineqartartoq. Tapiissutit pissarsiarineqartartut qanorpiaq atorneqassanersut peqatigiiffiup nammineerluni aalajangiiffigisassarai. Tapiissutit taakku amerlanersaasa ullumikkut allaffissornermut atorneqartarnerat peqatigiiffiup nammineerluni akisussaaffigaa. Naalakkersuisut pingaarnerutippaat kinguaassiuutitigut atornerlugaasimasut katsorsarneqarnissaannut, aamma atornerluisartut katsorsarneqarnissaannut, aningaasat atorneqarnissaat, Martha Lund Olsen oqarpoq.
