Tasiorta matusariaqalersoq
Tamanna pissutaalluni nuna tamakkerlugu oqarasuaatikkut normu 141 atorlugu siunnersuisarneq aappaagu februaarip ullusia 28-ata tungaanut ingerlanneqarallassasoq nalunaarutigineqarpoq.
Namminersorlutik Oqartussat ukiuni kingullerni marlunni suliniutinut aningaasat tapiissutigisartagaasa annikilliartuinnarnerat pingaarnertut pissutaalluni, qinnutigisartakkat affaat ataallugit annertussuseqalersimanerat pissutaalluni, Tasiortami siulersuisut Tasiortap matusariaqalernissaanik aalajangiisariaqarsimapput.
Peqatigiiffiup siunissami annertunerusumik tapiiffigineqartanissani naatsorsuutigissanngikkaa, Namminersorlutik Oqartussat nalunaarutigisimavaat, tamannalu pissutaalluni assersuutigalugu aningaasanik tapiissuteqartartut allat peqatigiiffimmut tapersersuillutik tapeerusunnerannut suliniutinullu tapiissuteqarnermikkut peqataanerat tapiissuteqarnissaminnut toqqammavigerusuttarmassuk, taama nalunaaruteqartoqarpoq.
Ikiorsiinissamut neqeroorutit qulakkeerneqarnissaat kaammattuutigineqarpoq
Naak Naalakkersuisuusimasut sivisuumik utaqqineqarsimasumik sinerissami kinguaassiuutitigut atornerlunneqarsimasut katsorsarnissaannut ikiuuttussanik angalasunik pilersitsisimagaluartut, suliniut pitsaasoq taanna pisariaqartitsisut amerlaqisut tamakkiinerusumik ikiornissaannut naammanngilaq:
- Kinguaassiuutitigut atornerlunneqarsimasut inuttut ajornartorsiutinik sorsugassaqartaqaat, taakkununnga inuttut aammalumi inuiaqatigiinnut sunniuteqarnerlussinnaasunik - kinguaassiuutitigut atornerlunneqarsimasut ikiorsinngitsoornissaat inuiaqatigiinnut akisuujussaaq, Tasiortami siulersuisut siulittaasuat Kisea Bruun tusagassiuutinut nalunaarummi ilaatigut allaaserisaqarpoq.
Naleqquttunik, minnerunngitsumillu naammattunik kinguaassiuutitigut atornerlunneqarsimasunut ikiorsiinissamut neqerooruteqarnissaq Inatsisartuni Naalakkersuisuni ilaasortanngortussat qulakkiissagaat, taassuma sakkortuumik taamaattumik aamma kaammattuutigaa.
