Tasiilaq eqqaalu takornariaqarnikkut coronamit eqqugaaqaaq
Islandimit Kalaallit Nunaata Kangianut ulluinnarlugu takornariartartut amerlapput. Tamanna Naatsorsueqqissaartarfiup allaaserisaani atuarneqarsinnaavoq.
Kisianni Coronavirusip akunnattoortitsinera tunumi aamma sunniuteqaqaaq.
Takornariaqarnerup tungaatigut eqqugaasut arlaqarput. Destination East Greenlandimi tunuliaqutaasut takornariartitsisartut namminersortut eqqugaangaatsiartut takornariartitsiviup pisortaa, Tupaarnaq Maqe, oqarpoq.
AAMMA ATUARUK Hotelinimi unnuinerit akileraaruteqanngitsumik sulinngiffeqarluni angalanermut aamma atuutilersut
Assersuutigalugu namminersortut takornarianik angallassisartut iniutillillu annaasaqangaatsiatut taanna oqarpoq.
- Allaat ilaasa angallatitik tuniniartariaqarlugit, ukiakkut aasakkullu takornariaqarnerpaaffiani isertitassaraluatik isertsinngitsooramikkit. Isertitatik akiligassanut atortaramikkit, isertitsisinnaannginnamillu atortuutitik ilaat tuniniartariaqarsimavaat.
Kulusuk timmisartumik Tasiilaliartut qanittuanilu nunaqarfinnukartut aqqusaartarfigaat, nunaniillu allaniit tassunga 2019-imi tikittut Naatsorsueqqissaartarfiup kisitsisaatai naapertorlugit 4.700-uupput.
Aamma kisitsisini Kommuneqarfik Sermersuup kangianut tunngasuni takuneqarsinnaavoq, akunnittarfinni 2019-imi unnuinerit 14.647-iusut, taakkunannga qassit takornariaanersut takuneqarsinnaanngilaq.
Soraarsitsisariaqarneq
Tasiilami Kulusummilu akunnittarfinni Arctic Wonderlandimi piginnittoq, Mike Nicolaisen eqqugaasut ilagaat.
Taassuma akunnittarfiutai upernaamit ukiassalerneranut ulapaarfiusaraluarput. Kisianni upernaaq manna tamaanngilaq. Aamma aasami ukiassamilu tikittoqarnissaa akunnittarfinni piginnittup ilimanaateqarpallaanngissoraa.
- Aggustimut 80 - 85 procent maannamut taamaatiinnarneqareerput.
- Allatut ajornartumik suliassaqannginnatta, sulisuvut amerlanerpaat suliassaqanngimmata soraarsippagut. Hotelimi sulisut 20-t missaanniittut suliunnaarput.
Mike Nicolaisen taama oqarpoq. Taasuma akunnittarfiutaani sulisut takornariaqaleruttornerani 50-it missaaniittaraluartut, taanna oqarpoq.
AAMMA ATUARUK Coronavirus peqqutaalluni akunnittarfinnik unnuisartut ikilingaatsiartut
Suliffeqarfiit sulisuminnik ilaatigut nunatta ilaani akunnittarfinni ataatsimiitsitsisarput.
Tunimili akunittarfiutillit ataatsimiigiartunit tikinneqarneq ajortut, Mike Nicolaisen oqarpoq.
Taamaammat coronacvirusip akunnattoortitsinera unammillernarsimavoq.
Akunnittarfiit inoqanngitsut
- Takornariat aasakkut inuussutigaagut, maanngami ataatsimiigiartoqarneq ajorpoq, akunnittarfik allatut atorneqarneq ajorpoq. Takornariat kisimik Kulusummi Tasiilamilu akunnittarfitsinni najugaqartartut inuussutissarsiutigaagut.
Mike Nicolaisenip oqarnera naapertorlugu suliffeqarfiutaata siornamut naleqqiullugu aningaasat 10 millionillit upernaaq manna annaavai.
