Coronavirus peqqutaalluni akunnittarfinnik unnuisartut ikilingaatsiartut
Takornariat Ilulissani akunnittarfimmut Hotel Hvide Falkimut inniminniisimasut taamaatitsiinnartalereersut, akunnittarfimmi aqutsisoq, Edvard Rosbach oqarpoq.
- Tassa 1 millionit tungaanut massakkut pallikkiartuinarparput, Edvard Rosback oqarpoq.
Coronavirusip nunatsinni sakkortuumik tuniluutinnginnissaa anguniarlugu nappaatit tuniluuttartut pillugit ataatsimiititaliarsuup, naalakkersuisullu pingasunngornermi nunatsinni nunanullu allanut angallannerit sukateriffigaat.
AAMMA ATUARUK Innersuussutit nutaat: Nunatsinnit nunatsinnullu angalasoqarnaveersaartoqarli
Sukaterinerillu akunnittarfimmut Hotel Hvide Falkimut sunniuteqalereerput.
Hotel Hvide Falkimi unnuisut 25 peocentii takornatriaasartut, aamma unnuisut 60 procentii nunatsinneersuusartut aqutsisoq ilisimatitsivoq.
Nunattalu iluani pisariaqanngitsumik angalannerup killilerneqarnera Hotel Hvidefalkimut kingunerlunnissaa naatsorsuutigineqalereerpoq.
Arlallit taamaatitsiinnartut
- Assersuutigalugu una qaammat marsimi naatsorsuutigisinnaagaluarparput 1000-it sinnerlugit inoqarsinnaalluta, kisianni massakkut ikiliartuinnarput.
Coronavirus nunatsinni siaruaatsaaliorniarlugu iliuusissatut naalakkersuisut inassutaat akunnittarfimmut kalluaagaluartut aqutsisumik paasilluarneqarsinnaapput.
- Soorunalimi aqutsisuulluni ajuusaarnarpoq tassunga killittoq. Kisianni allatut susinnaanngilagut, uku maleruagassat inassutigineqartut malissavagut, eqqissisimavugut.
Hotel Hans Egede aamma unnuisartuminik annaasaqarpoq
Nuummi akunnittarfimmi Hotel Hans Egedemik piginneqataasup, Helge Tangip Sermitsiaq.ag-mut oqarnera naapertorlugu aamma Nuummi akunnittarfik annaasaqangaatsiarput.
- Akunnittarfimmi unnuinissamut inniminniisimanerpassuit taamaatiinnarneqarsimapput. Ippassaq siumut inniminneriikkat 89.000 koruuninik nalillit annaavavut, Helga Tang Sermitsiaq.AG-mut ilisimatitsivoq.