Innersuussutit nutaat: Nunatsinnit nunatsinnullu angalasoqarnaveersaartoqarli
![](/sites/default/files/styles/image_934x467/public/article_images/pm-corona1.jpg?itok=t-6AqiQg)
Aatsaat pisariaqavitsillugu nunatsinniit nunatsinnullu angalasoqartassaaq.
Nunatsinnut tikeraarnissamik isumaliuteqartoqassanngilaq.
Aaqqissuussinerit 100-init amerlanerusunit peqataaffigineqartut inassutigineqanngillat, aamma bussini issiavinnit amerlanerusuni ilaasoqassanngilaq.
Tunillaassortunik nappaalasoqarneranut ataatsimiititaliarsuarmit innersuussutit nutaat Kim Kielsenip politimesterillu Bjørn Tegner Bayip Tunillaassortunik nappaalasoqarneranut ataatsimiititaliarsuarmi siulittaasuusup saqqummiussaat taama oqaasertaqarput.
- Angallannerit ilai eqqarsaatigalugit soorunami pisariaqartarput, maannga napparsimmavissuarmut ingerlassagaanni imaluunniit allanik, kisianni nalinginnaasut ikinngutit tikeraarniaannarlugit allallu taakkua pinaveersaartittariaqarpavut, Kim Kielsen oqarpoq.
AAMMA ATUARUK Illuatungiliuttut: Coronamik tuniluuttoqaqqunagu nunarput matuli
Nunatsinnit nunatsinnullu angallannerit sukannersumik inassutigineqanngillat.
Tamanna nunatsinni angallannermut aamma atuuttoq, Bjørn Tegner Bay ilassuteqarpoq:
- Nunatta iluani angallannerit sapinngisamik annikinnerpaatissavugut. Tamanna timmisartukkut umiarsuakkullu angallannernut atuuppoq.
- Nunatsinni illoqarfiit minnerugaangamik napparsimmaviit minnerusarput, taamaalillutillu pissutsinut ernumanarnerullutik. Taamaammat nunatsinni angallanneq sapinngisamik killilissavarput, Bjørn Tegner Bay oqarpoq.
Taamaammallu oqassaagut: Nunatsinnut piffissami matumani tikeraarniarlusi takorluuigussi angerlarsimaannassaasi. Aamma aap: Air Greenland timmisartumut ilaasortut ikilisinnissaat pillugu oqaatigaarput.
Nunatsinni tunillatsinnikoqanngitsoq
Nunatsinni coronavirusimik suli tunillatsinnikoqanngilaq.
Nunatsinni angerlarsimaffimmiit aneqqusaajunnaaqqallartut 25-t missaanniipput, pingasullu coronavirusimik tunillatsissimasinnaasutut pasitsaanneqaqqallutik.
Timmisartorsuarmut Danmarkimiit nunatsinnukartumi marlunngormat Kangerlussuarmut tikittumut ilaasuuvoq. Ullorlu taanna Nuummut timmisartumik ingerlaqqilluni.
AAMMA ATUARUK Kommunit coronavirusimik siaruatsaaliuinerminni sulitilluni angalanissat tamaatikkaat
Inuit allat Canadami Torontomi ataatsimeersuarnermi peqataanikuupput. Ataatsimeersuarmi inuk ataaseq peqataasoq coronavirusimik tunillatsissimasoq paasineqarpoq.
Malittarisassat nutaat sukannersullu tamatsinnut angalanngitsunut angalaniartunullu atuupput. Aaqqissuussinerillu inuit 100-t sinnerai, taakkua aamma sukannersumik inassutigineqanngillat, Kim Kielsen Bjørn Tegner Bayilu oqarput.
Illumi sanilerisaq biilinut ilaatinneqarli
Suliartorniarnermi busserniaraanni eqqarsarluartoqartariaqarpoq. Bussinimi issiavissat taamaallaat atorneqartassapput, bussit ulikkaarnissaat pinaveersaarneqassaq.
Ersiutit suuppat?
Coronavirusimik tunillatsissimasut ukuninnga ersiuteqarsimaspput:
- Pannertumik quersorneq
- Kissarneqarneq
- Anersaartorniarnikkut ajornartorsiuteqarneq
- Sulisut tamarmik arfineq-pingasunit sisamanut sulinissaat pisariaqarpa? Immaqa aqqanernut imaluunniit ullaaralaamiit sulisoqarsinnaavoq? Aamma illumi sanilerisaq bussertartoq nalunngikkaanni biilinilu inissaqartitsilluni kasuttorneqarsinnaavoq, Bjørn Tegner Bay oqarpoq.
AAMMA ATUARUK Ataatsimiititaliarsuaq: Danmarkimi pissutsit assingannik inissisimanngilagut
Sunngiffimmilu aliikkutarineqartartuutigut aamma annikillisinneqarput. Timersortarfiit, naluttarfiit kaffisorniartarfiillu inoqarsinnaassusaat affaannanngortinneqassapput.
- Inuilli timersortarfinnut kaffisorniartarfinnullu orniguteqqunnginnissaannut maanna pissutissaqanngilaq. Nunarput Danmarkimitulli suli inissisimalinngilaq, Bjørn Tegner Bay oqarpoq.