Ataatsimiititaliarsuaq: Danmarkimi pissutsit assingannik inissisimanngilagut
Nuummi inuit pingasut coronavirusimik tunillatsissimasutut pasitsaanneqarput. Taakku tamarmik tigusiffigineqarput, taakkulu Danmarkimut nassiunneqarlutik – taakku tallimanngornermi akissutersinissaat naatsorsuutigineqarpoq.
Inunniillu coronavirusimik tunillatsissimasinnaasutut pasitsaanneqartunit misiliutissatut tigusat Danmarkimut nassiunneqartarnerat, Naalakkersuisut tusagassiortunik katersortitsineranni aamma sammineqarpoq.
AAMMA ATUARUK Ataatsimiititaliarsuaq: Inuit pingasut coronavirusimik tunillatsissimasinnaasut
Taakkumi Danmarkimut nassiunneqartarnissaat suli pisariaqarpoq, nunatsinnilu misissuinermik suliaqartoqarsinnaanngilaq.
- Innuttaasut sumiiffinni immikkut aarlerinartumiissimasut ulluni 14-ini angerlarsimanissaat
- inuit immikkut aarlerinaateqartunut angalasimasut napparsimaveqarfinnut, utoqqarfiunut allanulluunniit sanngiitsoqarfiusunut pulaarnaveersaarnissaat
- Tunillaassortunik nappaalasoqarneranut ataatsimiititaliarsuuttaaq aaqqissuussinerit 1000-init amerlanerusunit peqataaffigineqartussat taamaatiinnarneqartariaqartut kaammattuutigaa.
- Atortussat sulisullu immikkut ilinniarsimasut maani amigaataanerat pissutigalugu toqqaannartumik misissuiniarneq ajornakusoorpoq, peqqinnissamut naalakkersuisoq, Martha Abelsen (S) oqarpoq.
- Nunatsinnili pilersitsisinnaanerluta misissuleruttorparput.
Atuarfeqarfiit ilinniarfiillu Danmarkimi matusut
Danmarkimilu pissutsit pingasunngornermi unnukkut ilungersunarnerulerput. Danskit naalakkersuisuisa katerinnerit 100-init amerlanerusunit peqataaffigineqartussat ataasinngornermiit inerteqqutigilerniarpaat.
Pisortat suliffeqarfiit, ilinniartoqarfiit ulluunerani paaqqinniffiit coronaivirusip tuniluunnerata annikillisarniarnera pissutigalugu matuneqarput, atuartut ilinniartullu ilinniarfeqarfiiniittut tamarmik aamma angerlartinneqarput, tallimanngornermiillu tamanna ulluni 14-ini atuutissalluni.
Meeqqat atuarfii ulluuneranilu paaqqinniffiit ataasinngornermiit sapaatit-akunneri marluk matoqqassapput.
Tamanna pissutigalugu kalaallit ilinniartut efterskolenilu atuartut atuariartorsinnaanngillat.
- Qanimut malinnaaffigivagut, Kim Kielsen oqarpoq.
- Nerisassaqassapput sunngiffimminnilu susassaqassallutik.
- Siunnersuutigineqartut tassa kuniunerit, eqitaarinerit assammiinerillu pinaveersaarneqarnissaat eqqaamallugit.
AAMMA ATUARUK Danmarkimi coronavirus pissutigalugu malittarisassat nutaat: Inuit 100-init amerlanerusut ataatsimooqqusaajunnaartut
Politiit pisortaat, Bjørn Tegner Bay Tunillaassortunik nappaalasoqarneranut ataatsimiititaliarsuarmi siulittaasuuvoq.
- Tunillaassortunik nappaalasoqarneranut ataatsimiititaliarsuup Danmarkimi susoqarnera qanimut malinnaaffigaa. Maanili pissutsit taamaanngillat. Taamaakkaluartorli innuttaasut ilitsersuutigineqartunik malinninnissaat pingaaruteqarpoq, siulittaasoq oqarpoq.
- Aamma nunatsinni katerinnerit 200-init amerlanerusunit peqataaffigineqartut inerteqqutigineqarnissaat pilersaarutaanngilaq, Bjørn Tegner Bay oqarpoq.
Københavnimi kalaallit peqqissartut illua napparsimasunut pulaartoqaqqusinngilaq.
Mittarfiit matunngitsut
Mittarfiilli nunatsinnukartunut suli ammapput. Taakkulu matuneqarnissaat aamma pilersaarutigineqanngitsoq, Bjørn Tegner Bay oqarpoq.
- Inuit Danmarkimiitiinnarnissaannut inatsisitigut pisussaaffeqartoqanngilaq. Aamma nunatsinnut angalasoqartitsisoqarsinnaanngilaq, taanna oqarpoq.
- Tuniluuttoqalernissaanut kinguarsaaniarsarivugut, Bjørn Tegner Bay oqarpoq.
AAMMA ATUARUK Ataatsimiititaliarsuaq: 1000-imik amerlanerusut katersuunnissaat unitsillik kinguartillilluunniit
Tamannalu Kim Kielsenip isumaqatigaa:
- Nunatsinni coronavirusimik tuniluuttoqaleriataassagaluarpat peqqinnissaqarfiup suliaqarniarnera ajornakusuulersinnaavoq. Tamanna nakorsaaneqarfiup coronavirusi pillugu tusagassiortunut ippassaq katersortitsinermi paasissutissiissutigaa.
- Tuniluuttoqaleriataassagaluarpat tamanna peqqinnissaqarfimmut ajornakusuussaaq. Taamaammat uteqqissavara: Utoqqartaqarlutalu sanngiitsortaqarpugut. Taamaammat innersuussutaasut malinneqarlik. Tamanna pingaaruteqarpoq. Peqqinnissaqarfiummi tamanna nammassinnaanera ilisimaneqanngilaq, Kim Kielsen oqarpoq.
Nunanut allanut tungasunut ministereqarfiup ukununnga angalasoqaqqunngilaa
• Kina: Nunap immikkoortua Hubei
• Italia: Nunap immikkoortui Piemonte, Lombardiet, Emilia-Romagna, Aostadalen, Veneto aamma Marche
• Iran
• Korea Kujalleq: Illoqarfik Daegu nunallu immikkoortua Gyeongbuk
• Østrig: Nunap immikkoortua Tyrol
Nunanut allanut tunngasunut ministereqarfiup ukununnga pisariaqanngitsumik angasoqarnissaanut nangaasaarutigaa
• Kina (sumiiffit aappaluttumik qulequtsersimanngitsut kiisalu Hongkong, Macau aamma Taiwan minillugit)
• Italia: Nunap sinnera (sumiiffiit aappaluttumik qulequtserneqarsimanngitsut minillugit)
• Israel
• Palæstina: Vestbredden aamma Jerusalemip kangia
• Spania: Nunap immikoortui Madrid, La Rioja kiisalu Spaniap Avannaani nunap immikkoortua
• Tyskland: Nunap immikkoortui Bayern aamma Nordrhein-Westfalen
• Frankrig: Nunap immikkoortui Korsika, Alsace, immikkoortortaqarfiit Oise aamma Parisip avannaani Val d’Oise
• Schweiz: Sumiiffiit Ischglimi killeqarfiit tikillugit
• Tyrkia
• Thailand
• Egypten
• Vietnam
• India
Tusarfiit: Tunillaassortunik nappaalasoqarneranut ataatsimiititaliarsuaq aamma Nunanut allanut tunngasunut ministereqarfik