Ataatsimiititaliarsuaq: 1000-imik amerlanerusut katersuunnissaat unitsillik kinguartillilluunniit
1000-inik amerlanrusumik peqataasoqartumik marsip naanissaanut aaqqissuuisoqassanngilaq.
1000-it inorlugit peqataasoqartussamik aaqqissuussisut eqqarsarluaqqissapput.
- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.
- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.
Nunat aarlerinaatilittut pineqartut makkuupput:
- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu
Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik
Tunillaassortunik nappaalasoqarneranut ataatsimiititaliarsuami ullumi inassutai nutaat taamaapput. Danmarkimi maleruagassat ullumi nutarterneqareersullu nunatsinni inassutit nutaat takkupput. Tassami aaqqissuussinerit 1000-inik amerlanerusut kinguarteqqullugit taamaateqqullugilluunniit, ministeriuneq Mette Frederiksen ullup qeqqata siorna kaammattuivoq.
- Maleruagassanik, Danmarkimi inassutinut ullumi saqqummiunneqartunut asigusunik, Kalaallit Nunaanni atuutilersitsissalluni, Tunillaassortunik nappaalasoqarneranut ataatsimiititaliarsuaq isumaqatigiissoq inassuteqarpoq, ataatsimiititaliarsuaq tusagassiutinut allappoq.
Namminersorlutik Oqartussani sulisut pakkuttassanngitsut assatillu eqqiluitsilluinnassagaat ullumi aamma ilisimatinneqarput.
Coronavirusimik nunatsinni suli tunillatsittoqanngilaq. Danmark inuit 22-it tunillatsissimapput, inullu ataaseq peqqilleqqissimalluni.
Savalimmiuni ataaseq tunillatsissimavoq Islandimilu inuit 43-it tunillatsissimallutik.
nunatsinnili tunillatsittoqarnissaa ilimanarluinnartoq, nunatta nunakorsaaneqarfia naliliivoq – taamaammallu Tunillaassortunik nappaalasoqarneranut ataatsimiititaliarsuup inassutinik ullumi nutarterpai. Imaappullu:
Aaqqissuussinerit 1000-init amerlanerusunit peqataaffigineqartut:
- Tunillaassortunik nappaalasoqarneranut ataatsimiititaliarsuup kinguartinneqarnissai taamaatiinnarneqarnissaanut kaammattuutigaa. Kaammattuuteqarneq marsip naanissaanut atuuppoq.
Aaqqissuussinerit 1000-init ikinnerusunit peqataaffigineqartut:
- Aaqqissuussisut tuniluuttoqarnissaata aarlerinarnera pissutigalugu aaqqissuussinissamik kinguartitsisoqassanersoq taamaatitsiinnartoqassanersorluunniit aalajangertariaqarpaat. Inuit amerlasuut ataatsimoorneranni aaqqissuussinermilu peqataasut timikkut qaninneranni tunillaassortoqarnissaa aarlerinarnerussaaq.
- Tamatuma saniatigut illup iluani aaqqissuussinerit silami aaqqissuussinernit tuniluuttoqarnissaanut aarlerinarnerussapput.
- Aaqqissuussinernik anginerusunik aaqqissuussisut peqataasussat anersaartorfitsigut tunillatsissimanermik takussutissaqartut (quersorneq tangajornerlu) peqataanissaat innersuunneqanngitsoq ilisimatitsissutigisariaqarpaat.
- Sprittit assammut saligut allarutissiallu qaqorsaatillik piareersimasuutinneqassapput.
- Issiaviit nalinginnaasumit ungasinnerutillugit inissinneqassapput.