Ataatsimiititaliarsuaq: Inuit pingasut coronavirusimik tunillatsissimasinnaasut
Oqartussat Nuummi inuit pingasut coronavirusimik tunillatsissimasinnaasutut pasitsaateqqavaat.
Taakku taamaammat Nuummi angerlarsimaffimminnit aneqqusaanngillat, akissutissarsinissaminnillu utaqqillutik. Tunillaassortunik nappaalasoqarneranut ataatsimiititaliarsuaq tusagassiuutinut nalunaarummi taama paasissutissiivoq.
Inuk ataaseq Danmarkimi timmisartorsuarmut ilaalluni marlunngormat Kangerlussuarmut tikippoq. Nuummut ullorlu taanna timmisartumik ingerlaqqippoq.
Politiit issiaviusumik issivinnik marlunnut ungasitsigisumi issiasimasut, tunillatsissimasinnaasut Nuummullu ilaasimasut allat attuumassuteqartut attavigeqattaaleruttorpaat. Inuit coronavirusimik tunillatsissimanermut ersiutaasinnaasunik maluginiaanissamut ilitsersuunneqarput.
Timmisartumut ilaasimasut ersiutinut nakkutiginnissasut
Timmisarttut pineqartut tassaapput GL781 Danmarkimiit Kangerlussuarmukartoq aamma timmisartoq GL555 Kangerlussuarmiit Nuummukartoq.
Innuttaasut timmisartunut taakkununnga ilaasimasut attavigineqanngitsullu "tunillatsinnaanermut aarlerinaatikinnerusuniipput".
- Taamaammat ulluinnatit killilersuiffiunngitsumik ingerlatiinarsinnaavatit, taamaakkaluartorli napparsimanermut ersiutaasinnaasut maluginiassagitit kaammattuutigineqarpoq. Ersiutit taakku tassaasinnaapput kissarneqarneq, quersorneq, anernilunneq, niaqorlunneq nukinillu anniarneq.
- Inuit nakorsaanermit attavigineqarsimanngitsut Canadamilu ataatsimeersuartoqarnerani peqataasimasut taama aamma kaammattuuteqarfiupput, Tunillaassortunik nappaalasoqarneranut ataatsimiititaliarsuaq allappoq.
Inuit allat marluk Canadami Torontomi ataatseersuarnermi peqataaqqammerput. Ataatsimeersuarnermilu tassani peqataasunit ataaseq coronavirusimik tunillatsissimasoq paasineqarsimavoq.