Danmarkimi coronavirus pissutigalugu malittarisassat nutaat: Inuit 100-init amerlanerusut ataatsimooqqusaajunnaartut
Danskit naalakkersuisuisa inuit 100-init amerlanerusut peqataaffigisassaat ataasinngornermit inerteqqutigilerpaat.
Ministeriuneq, Mette Frederiksen (S) tusagassiortunik pingasunngornermi unnukkut katersortitsinermi oqarpoq.
- Danskit amerlasuut ataatsikkut tunillatsinnissaat pinaveersaassavarput. Tunillaassornera sukkasoorujussuuvoq. Sukkavallaarujussuarpoq. Taamaammat oqartussat suliniuteqarnertik sukannerpaat.
AAMMA ATUARUK Sjællandip avannaani napparsimaviup nakorsaanerit nukinginanngitsut tamarmik taamaatiinnarai
Danskit naalakkersuisuisa katerinnerit 1000-init amerlanerusunit peqataaffigineqartussat taamaatiinnarneqarnissaat kinguartinneqarnissaalluunniit tallimanngormat kaammattuutigaat.
Danskilli naalakkersuisuisa inatsit inuit 100-init amerlanerusut illup iluani ataatsimoornerannut inerteqquteqarlersinnaasoq, Folketingimit tuaviortumik suliaritikkusuppaat.
- Ullumikkut inatsit malillugit inerteqquteqarsinnaatitaanngilagut, kisianni Folketingip inatsimmik tuaviortumik suliaqarnissaa piumasarissavarput, Mette Frederiksen oqarpoq.
Inerteqquteqarnerup ataasinngornermit atuutilersinneqarnissaa naatsorsuutigineqarpoq.
AAMMA ATUARUK Kielsenip tusagassiortunik kalaallisut katersortitsisoqartalernissaa neriorsuutigigaa
Tamatuma saniatigut imerniartarfiit, illullu iluani kulturikkut sullissiviit atuakkanillu atorniartarfiit erngertumik matuneqarnissaat kaammattuutigaarput.
Suliniuteqarnikkut coronavirusip Danmarkimi siaruaanneranik annikilliinissaa neriuutigineqarpoq.
Danmarkimi coronavirusimik tunillatsissimasut pingasunngornermi unnukkut 514-it nalunaarsorneqarput. Taakkunannga qulit napparsimmavimmut unitsinneqarsimapput, marlullu peruluttut uninngavianniittut, peqqinnissamut ministerip, Magnus Heunickep (S) paasissutissiissutigaa.
Inuit 1303-t aneqqusaanngikkallartut ullumi siusinnerusukkut nalunaarutigineqarpoq.