Kielsenip tusagassiortunik kalaallisut katersortitsisoqartalernissaa neriorsuutigigaa
Naalakkersuisut coronavirus pillugu paasissutissat kingulliit pillugit tusagassiortunik marlunngormat ullorornerani katersortitsinerat inuppassuarnit pissangatigineqarluni malinnaavigineqarpoq.
Nunatsinnili inuit amerlanerpaartaat kalaallisuinnaq oqaaseqaraluartut tusagassiortunik katersortitsinerat, tunillaassortunik nappaalasoqarneranut ataatsimiititaliarsuarmit aamma peqataaffigineqartoq, qallunaatuinnangajak ingerlanneqarpoq.
Tamanna tusarnaarsimasorpassuit isiginnaarsimasorpassuillu KNR-imut, tusagassiortunik katersortitsinermik fjernsynikkut, radiokkut nittartakkakkullu toqqaannartumik aallakaatitsisumut, siarngunnerannik allannerannillu kinguneqarpoq.
AAMMA ATUARUK Coronavirus pillugu tusagassiortunik katersortitsineq takujuk takoqqigulluunniit
- Taakku pisut ilinniutaapput, Naalakkersuisut siulittaasuat Siumumeersoq Kim Kielsen oqarpoq, taassumalu taama pisoqaqqissannginnerarpaa.
- Pisut taakku qaangiutereerput, aaqqinneqartussaavoq, tassa taama pisoqaqqissanngilaq. Taanna oqariartuutigisinnaavarput, Kim Kielsen Qanoruumut oqarpoq.
Kalaallisut paasissutissiisoqannginnera sapaatip-akunnerata siuliani isornartorsiorneqartoq
Naalakkersuisut coronavirusimut tunngatillugu paasissutisseeriaasertik pillugu isornartorsiorneqareernikuupput. Kalaallisut paasissutissat amigaataasut, Inuit Ataqatigiinneersoq Sofia Geisler oqarpoq.
AAMMA ATUARUK Naalakkersuisut coronavirusimut paasissutissiineq pitsanngorsarniaraat
Peqqinnissamut naalakkersuisup, Martha Abelsenip (S) coronavirusi pillugu paasissutissanik kalaallisoortunik Nunatta Nakorsaaneqarfiata nittartagaani nassaassaqarnerarpaa. Nassaassaavallaannginneralli nassuerutigalugu.
Tunillaassortunik nappaalasoqarneranut ataatsimiititaliarsuup Savalimmiunit angalasut pingasut coronavirusimik tunillatsissimassangatinneqartut ataasinngormat ullaap-tungaani nalunaarutigaa. Tunillatsissimanngitsulli paasineqarpoq. Taakkuli misissorneqarnerat allatut inerneqarsimagaluarunik nunatsinni tunillatsissimasuni siullerpaassagaluarput.
