Kommunit coronavirusimik siaruatsaaliuinerminni sulitilluni angalanissat tamaatikkaat

Kommunit pingasut sulitilluni angalanerit meeqqallu atuarfiinit paasisassarsiorluni nunanut allanut angalanerit unitsippaat.

Kommune Kujalleq, Kommune Qeqertalik Kommuneqarfik Sermersoorlu taama maleruagassiorput.

- Kisitsisit qiviassagaanni (coronavirusip aaqq.) ilimanarsinnaavoq nunatsinnut pissasoq. Taamaammat uagut suliffeqarfittut akisussaaffik tiguarput. Sapinngisarpullu tamaat sulissutigalugu sulisutta akornanni tuniluutinnginnissaa, Kommuneqarfik Sermersuumi pisortap tullersortaa Marie Fleischer oqarpoq.

- Upalungaarsimanermut pilersaarutit februaarimi suliarilerpagut. Assersuutigalugu arlaannik pisoqassagaluarpat qanoq iliuuseqassaagut.

Kommune Kujallermi sulisut sulinerminnut atatillugu aaqqissuussat suut peqataaffigineqaqqusaajunnaarnerinut aamma maleruagassaqalerput.

Ulluinnarni ingerlatsineq qulakkeerniaraat

Kommune Kujalleq coronavirus pillugu sulisut sulinerminni aaqqissuussani sorliit peqataafigisinnaaneraat maleruagassiorpoq.

Nunani tamalaaneerrsut peqataaffigisaanni ataatsimeersuarnerit pikkorissarnerillu ilaatigut tamatumani pineqartut, kommunip pisortaanera Kim Dahl oqarpoq.

- Aaqqissuussinernut assigiinngitsunut sammisassaqartitsinernulluunnuut inunnit 500-t sinnerlugit peqataaffigineqartut peqataaffigineqartannginnissaannut aalajangersaavugut, Kim Dahl oqarpoq.

Kommune Kujallermi sulinermut atatillugu nunanut allanut angalanerit aamma taamaatiinnarneqarput. Taama aalajangerneq qaammat ataaseq atuutissaaq, taamanikkussamullu nalilersoqqinneqassalluni. Kommunimi ulluinnarni ingerlatsinera qulakkeerumallugu taama aalajangertoqartoq pisortaaneq nassuiaavoq.

- Utoqqaat illuini sulisoqarpugut, meeqqerivinni sulisoqarpugut, atuarfinni minnerunngitsumillu qatserisartut annaassiniaasartullu. Tassa taakku tamarmik kommunip ataani sulisuummata tuniluunnissaa pinaveersaarusuttorujussuuarput.

- Tuniluunnerup kigaallassimaarnissaa sapinngisamik anguniarparput.

Kommuni Qeqertalik upalungaarsimanermi aqutsisuliortoq

Kommune Qeqertalimmi sulisut aaqqissuussanut 100-t sinnerlugit peqataaffigineqartunut sulinerminni aamma peqataassanngillat.

Nualluullu takkutissagaluarpat qanorpiaq iliornissartik suli pilersaarusioritsik borgmester Ane Hansen oqarpoq.

- Nappaalasoqarnera pissutigalugu mattussisoqassagaluarpat ileqqussagut, sukkut ikiuutissanersugut, sulisugut sorliit isumalluutigissanerigut tamakkua massakkut upalungaarsornerit ingerlappagut, borgmesteri oqarpoq.

Kommune Qeqertalimmi upalungaarsimanermi aqutsisoqatigiiliorpoq. Tassani borgmesteri, pisortaaneq, illoqarfinni pisortat upalungaarsimanermilu pisortaq suleqatigiillutik maleruagassat suliaraat.