Tasiilami nuna nalinginnaasumit amerlanerujussuariarluni 2025-mi sajuttoq
Tasiilami eqqaanilu nunap 2025-mi sajuttarneri Tasiilamiunit ernummatigineqartoq, Siumumeersoq Lars Poulsen oqarpoq.
Taanna upalungaarsimaneq sillimaniarnerlu eqqarsaatigalugit oqartussat qanoq pilersaaruteqarnersut paasiniarlugit naalakkersuisunut apeqquteqarpoq.
Tasiilami nuna sajulaaqattaartoq KNR-ip allaaserereerpaa.
Nunallu ukiut siuliini sajuttarnerinut naleqqiullugu nuna 2025 sajuttaqattaarnerujussuusoq naalakkersuisut Lars Poulsenimut akissutaanni atuarneqarsinnaavoq.
- Tasiilap eqqaani sumiiffimmi 2025-p aallartinneraniit ullumimut nunap sajunneri 552-it paasineqarput. Taakku siornatigumut sanilliullugit amerlanerujussuupput, GEUS naalakkersuisut akissutaanni allappoq.
Taakkulu nunap 2021-mit 2024-mut sajuttarnerisa katillugi amerlassusaannut amerlanerupput.
Nuna 58-eriarluni 2024-mi sajussimasoq nalunaarsorneqarpoq. Nuna 2023-mi 190-eriarluni sajussimavoq, 2022-mi 116-eriarluni 2021-milu 167-erialuni sajussimalluni.
- Sajulaartarnerit piujuaannarput. Qanngulunneq, sajuppalulaarnerit akulikitsumik pisarput. Kisianni maluginiagassaagamiuna ukioq manna akulikitsuaraararsuarmik sakkortuumillu sajoqattaartoqarnera, Lars Poulsen oqarpoq.
Nangipporlu:
- Illu sajungaatsiarluni, neeqqulussuaq seqqorpalussuaq, pisattat qulliit aalallutik taama sajungaatsiartarsimatigaaq.
Nunap sajunneri ukiuni kingullerni 25-ni sakkortunersaani pingasuni marluk 2025-mi pisut
GEUS-illu akissutaani tamanna takuneqarsinnaavoq.
- Ukiuni kingullerni 25-ni GEUS-ip Tasiilap eqqaani nunap sajunneri (Richterskala malillugu aaqq.) 4.0-imit sakkortunerusut pingasut sumiiffissivai, taakkunannga marluk 2025-mi pipput, GEUS allappoq.
Tamatuma saniatigut 3,5-imit sakkortunerusuni qulini uuttortarneqartuni sisamat 2025-mi uuttortarneqarput.
DMI-p nittartagaani allaqqasut naapertorlugit, nuna richterskalami sisamanit sakkortunerusumik sajuttoq tamangajanninngaanniit malugineqartarpoq, qarmammullu qalliaqutinik kaanngalasunik kaanngartoqarsinnaalluni.
Tasiilami nuna sisamanit sakkortunerusumik novembarimi kingullermik sajuppoq. Lars Poulsen tassani nammineerluni Tasiilamiinnani erseqqissaavoq. Elise Uupi Kuitseli nunap novembarimi sajunnerani Tasiilamiippoq. Taannalu KNR-imut taamani ima oqarpoq.
- Amiilaarnaqaaq sakkortoorujussuarmik nipi, soorlu aatsaat taama sakkortutigisumik misigivara. Tamaani inunngorpunga tamaani peroriartorpunga aatsaat taama sakkortutigisumik misigivara, Elise Uupi Kuitse novembarimi oqarpoq.
Nunap sajunnera Tasiilami 4,2-mik uuttortaavinnilu ungasinnerusunit 4,8-mik sakkortutigisutut taamani uuttortarneqartoq, GEUS allappoq. Taanna ilanngullugu allappoq, nunatta kangiata kujasissortaani nunap sajunnera sakkortunerpaaq 5,4-mik uuttortarneqartoq. Taannali atortut digitaliusut atulernerat sioqqullugu uuttortagaagami ilumut taama sakkortutigisimanissaa nalorninarneruvoq.
Nunap novembarimi sajunneranut suna pissutaanersoq nalunartoq GEUS-imit taamani oqaatigineqarpoq.
Navianartoqassappat innuttaasut paasitinneqarumaartut
Lars Poulsenillu nammineq Tunuminngaanneersup Tasiilami pisunik malinnaalluni Tasiilamiittunillu oqaloqateqartarluni paasissutissiissutigaa. Nunallu 2025-mi sajuttarnera amerlasuunit ernummatigineqarneranik paasitinneqartarluni oqarpoq. Tamannalu naalakkersuisunut apeqquteqarnerminut tunngavigaa.
- Upalungaarsimaneq sillimaniarnerlu eqqarsaatigalugit, arlaatigut upalungaarsimasuutitat qanoq periusissiaqarnersut tusassallugit innuttaasunut toqqissisimanartumik inissisimasoqarnissaa tassani pingaarnertut angorusussimavara, Lars Poulsen oqarpoq.
Pisoqassappat Kommuneqarfik Sermersuup upalungaarsimasui isumaginnittussaasut, naalakkersuisut allapput. Immikkut pisoqartillugu upalungaarsimanermut pilersaaruteqartoq aamma allapput.
Kommunillu upalungaarsimasui naammassanngippata, Kalaallit Nunaanni upalungaarsimasut sulilersinneqassapput.
Aamma ulorianartorsiortitsisumik sajuttoqassappat, kommuni imaluunniit Kalaallit Nunaanni Upalungaarsimanermut Ataatsimiititaliarsuaq innuttaasunut ilisimatitsissasoq, naalakkersuisut allapput.
- Maannamut nunap sajunneranit aarlerinartunik innuttaasunut paasissutissanik nassiussinissamut pisariaqarsimanngilaq, naalakkersuisut akissumminni allapput.
