Kujataani ukiut 20-t matuma siornali aatsaat taama sajutsigeqqittoq

Nunap sajunnera inoqarfinniit ungasingaatsiarpoq, ulorianaranilu, GEUS taama ilisimatitsivoq.

Allattoq Marie Kûitse, Anders Dall

aggustip 26-at 2021 14:23

Nanortallip avannaata kangiata tungaani ippassaq nuna 4,5-imik sakkortussuseqartumik nuna sajuppoq.

Kujataani taama annertutigisumik ukiut 20-t matuma siorna sajuttoqarmalli aatsaat taama sajutsigeqqippoq.

Danmarkimi Kalaallit Nunaannilu ujarassiuutut misissuiffimmi GEUS-mi ilisimatooq, Trine Dahl- Jensen KNR-imut ilismatitsivoq.

- Kalaallit Nunaata kujataani ippassaq nalunaaqutaq pingasoqeqqartoq nuna 4,5-imik sakkortussusilimmik nuna sajuppoq. Taannalu sakkortussuseq Kalaallit Nunaata nunartaata sajuttarnera eqqarsaatigissagaani sakkortuvoq. Kujataani taama sakkortutigisumik ukiut 20-t matuma siornali aatsaat sajoqqippoq, Trine Dahl Jensen oqarpoq.

Inoqarfimmiit ungasingaatsiarpoq

Kujataani pingasunngornermi ualisoq pingasup qeqqanut nuna sajuppoq. Sajunnerlu Kangerlussuatsiap eqqaaneersoq, Trine Dahl-Jensen oqarpoq.

- Sajuffik najugaqarfinnut ungasingaatsiarpoq, najugaqarfik qaninnerpaaq 100 kilometerisut ungasitsigaaq, taamaammat ajoqusertoqanngilaq. Sajunnerlu ulorianartuunngilaq, taanna oqarpoq.

AAMMA ATUARUK Sisimiuni nuna sajoqqittoq: Nunap sajunneri annikitsut marluk

Nunap sajuttarneranut tunngasut GEUS-ip nittartagaani: geus.dk.- qimerloorneqarsinnaapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.