Tasiilami Maaji peqqinnartuutinniarpaat
Aaqqissuussineq, Nuummi aallartinneqartoq, Tasiilami siorna 2011-mi pimmat, iluatsilluartorujussuuvoq, sorparujussuarnik aaqqissuussisoqarpoq, "Maaji Peqqinnartuutiguk"-llu ukioq-manna suli iluatsilluarnerunissaa suna tamaat atorlugu sulissutigineqartoq, aaqqissuussisut ilaat, Patrick M. Abrahamsen, tusagassiuutinut allappoq.
Siumoortumik ippassaq qilanaartuusiisoqarpoq, Tasiilarmiummi Timersortarfimmi tillersiorneqarput qasujaassusaallu aamma uuttortarneqarluni. "Maaji Peqqinnartuutiguk"-mimi timersuuterpassuarnut peqataassagunik peqqissusertik siumoorlutik ilisimasariaqarpaat.
Maaji naappat tamakku aamma uuttorneqassapput, neriuginartumik qanoq siuariarsimatiginertik taamaalillutik paasissammassuk.
Ukioq-manna aaqqissuussinerit qassinilluunniit ukiulinnut tulluarsagaapput, meeqqanut minnerpaanut naleqquttuniit, tassa imaani ujajaasunik malersuisuusaarnerniit, ukioqqortunerulaartunut ajaappiarluni pisunnernut aamma Zumbamik qitinnernut.
Pilersuisoq peqqinnartunik nerisassiornermut pikkorissartitsissaaq, taava aamma pujortartarneq, imigassaq naamaartarnerlu pillugit Peqqinnissaqarfik Tasiilamilu suliffeqarfiit paasisitsiniaassapput.
"Maaji Peqqinnartuutiguk" pisortatigoortumik maajip ulluisa aallaqqaataanni ammarneqassaaq, kikkulluunniit soqutiginnittut peqqinnartumik arpatsinneqassallutik.
