Tasiilami innuttaasut utertitanit koruuninik tusindilinnik iluanaartut
Tasiilami innuttaasut arlallit utertitassaatitik toqqoqqasimavaat. Taakkumi utertitassaatitik utertitseriaatsip nutaap januaarip aappaani atuutilernissaanut uninngatikkunikkit iluanaarutiginerulaarsinnaallugit naatsorsorsimavaat.
Puiaasammi qillertuusalluunniit aki 1.333 procentimik qaffappoq.
- Januaarip aallaqqaataani puiaasat 20.000-it utertinneqarput, Pilersuisup Kangiani immikkoortortaani pisortaq, Martha Mikaelsen oqarpoq.
Puiaasat tusindillit Pilersuisup Tasiilami utertitsisarfittaavatigut nutaakkut ingerlaartinneqarput. Tasiilami innuttaasut ukiup nikinnginnerani kommunimut aqqusaarlutik puiaasaq ataaseq 0,15 koruuninnassutigisarpaat.
- Ullut taakku puukut aallartimmata inuppassuit utertitsiartorput, pisiniarfik ulloq tamaat puukunik utertitsisartortunik ulikkaarpoq, taavalu nærbutik ulloq tamaat taanna inoqartuarsimavoq ulikkaavilluni utertitsiartortunik. Ullut taakkuinnaanngilaq ullut arlaqartut ulloq manna tikillugu suli utertitsiuarput, Martha Mikaelsen oqarpoq.
Kitaani ulapputtut kangiani ulapputinngitsut
Puiaasalli tusindilippassuit Pilersuisup sulisuinut ulapititsinerunngilaq. Pisiniarfiummi utertitsisarfia nutaaq pisoqqanik nutaanillu utertitsiviusinnaavoq.
- Kisianni eqqiaasoqarnerunissaa pisariaqarsimavoq, tamannalu immikkut saniatigut suliassaqartitsilluni, Martha Mikalesen oqarpoq.
Utertitseriaaserli nutaaq tamanut iluatsitsiviunngilaq. Nuummi Brugsenimi utertitsiviit nutaat suli pissarsiarineqanngillat, taamaammallu puiaasat qillertuusallu nutaat maskiinanut utertinneqarsinnaanngillat.
- Puiaasanik utertitsiviit nutaat pissarsiarinissaat angumerinngilarput. Kisianni sulisugut utertitassalerisillugit utertitsisinnaatitsivugut, Brugsenimit Randi Vestergaard Evaldsen KNR-imut ataasinngormat oqarpoq.
Brugsenip utertitsiviit nutaat qaammatit pingasut tulliuttut ingerlaneranni tikinnissaat naatsorsuutigaa.
Avatangiisinut pitsaasoq
Tasiilami Martha Mikaelsenip innuttaasut puiaasanik tusindilippassuarnik utertitsinerat nuannaarutigaa. Naak innuttaasut utertitseriaatsip nutaap atuutilernissaanut utaqqinerat pissutigalugu Pilersuisup isertitassanit annaasaqarneranik tamanna kinguneqaraluartoq.
Tasiilarmiut ukiup nikinnginnerani utertitsisimasuugunik utertitat katillugit 3.000 koruuninnassutigissagaluarpaat. Utaqqigamilli 40.000 koruuninut utertitsisoqarpoq.
Tamannali immikkoortortami pisortamut isumaqanngilaq. Taassuma pinngortitami puiaasakinnerulernera nuannaarutigiinnarpaa.
- Ilimanarpoq taamannak ingerlaannassappat, illoqarfitsinni eqqiluisaarnikkut sunniuteqassasoq, soorlu sissami eqqaaneq annikilliorujussasoq. Uani utertinneqartalertut amerlatsinneranni taamaammat naatsorsuutigaara taamannak sunniuteqassasoq, taanna oqarpoq.
