Utertitalerisut appillu utertitsisarfiit nutaat ajornartorsiutaanerannut aaqqiissutaassasut
Qillertuusat sodavandillu 2 literit puukui plastikkit.
Imeruersaatit nutaat pisiniarfinni januaarip aallaqqaataanit pisiarineqarsinnaalersut ilagaat. Nioqquteqarnermimi imeruersaatit nutaat ammaanneqarput, taamaammallu nutaamik utertitseriaaseqalerpugut.
Tamannali Brugsenimut ulapisitsilaarput. Brugsenimmi pisiniarfiini tamani utertitsisarfiit nutaat suli piareeqqajanngillat.
Tamanna Randi Vestergaard Evaldsenip oqaluttuaraa:
- Maskiinat nutaat utaqqivagut, taakkualu takkussuutilissapput uani januaarip, februaarip marsillu ingerlaneranni ikkussuunneqarlutillu, taanna KNR-imut oqarpoq.
Assaat atorlugit suliaqartoq
Taamaammat Brugsenip qangatut utertinneqartunut assaat atortariaqarpai. Utertinneqartut tamarmik maskiinanut isersinnaanngillat. Taamaammat sulisut atsipaatit qullartariaqarpaat, taakkulu ukiumi nutaami ulapipput.
- Maskiinatigut angumersinikuunngilagut, kisianni aamma allannguilluta eqqarsarluta manueltimik utertinneqarsinnaanerat piviusunngortinnikuuarput, tassa imaappoq maskiinat atunngikkaluarlugit sulisugut atorlugit utertinneqarsinnaallutik, Randi Vestergaard Evaldsen oqarpoq.
Qangatulli utertitassalerisut immiaarakorsunnimik naamasaqarsinnaanermi saniatigut teknologii nutaaliaq aamma atorpaat.
Appimi Utertitsisamik taaguutilik pilersinneqarpoq. Taanna atorlugu puukut Brugsenimut, Pilersuisumut, Akikimut, Pisiffimmulluunniit utertikkiartunnginneranni utertitsivimmut tunniunneqarsinnaanersoq paasineqarsinnaavoq.
Ataavartumik aaqqiissutaasussat utaqqineqartut
Nuuk Imermit maanna matusimasumit juullinnginneranit ukiortaannginneraniillu puiaasatoqqanik pisisimaguit taakku suli utertinneqarsinnaapput. Brugsenimmi Nuuk Imermit puiaasat suli tigoqqarallassavai:
- Nuuk Imerminngaannersut pisiassat uani APP-imi Utertitsisa-mi ilaanngillat, kisianni utertitsivinni tamani utertinneqarsinnaapput, suli aggustip 31-at tikillugu, Randi Vestergaard Evaldsen oqarpoq.
Brugseneqarfiit amerlanerpaat maanna maskiinanik utertitsissutinik nutaanik peqalereerput, qaammatinilu tullerni utertitsissut qillertuusanik, plasktikkinik, ingalaaminernillu immikkoortitsissutitallit ikkussuunneqassapput.
Ikkussuunneqarnissaanulli naammagittalaartariaqassaatit.
Suliarpassuaqarneralu pissutigalugu maskiinat nutaat sooq utertitassanut maskiinanik nutaanik peqarnissaanik peqarnersoq imminut apeqqutigineqarsinnaavoq.
Randi Vestergaard Evaldsenillu nukillalaarnarnera paasisinnaavaa, oqaluttuarporli:
- Nutaangitsut onlinekkut ingerlanngillat, ukualu nutaat onlinekkut ingerlapput. Tassa uagut suliffeqarfitta iluani ikkussuukkutsigit stregkodit automatiskikimik uunga maskiinamut ikkunneqartarput. Taamaalillutillu aamma ugguuna atuarneqarsinnaallutik utertitassat suut utertinneqarsinnaanersut, Randi Vestergaard Evaldsen oqarpoq.
