Utertitseriaaseq: Ulluinnarni atortussanik niuertarfiit immikkut ittumik akuersissummik qinnuteqataat itigartitsissutigineqartoq

Pisiniarfiit 2024-mi januaarip aallaqqaataanni utertitseriaatsimut nutaamut piareersimassapput. Kisianni Pisiffik Brugsenilu piareersinnaanngillat. Taamaattumik immikkut akuersissuteqarfigineqarnissamut qinnuteqarput. Tamannali Naalakkersuisut itigartitsissutigaat.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik tusagassiuutinut nalunaarummi taama allappoq.

Itigartitsinermi ’susassaqartut allat utertitsivinnik imaluunniit nammineq assammik aaqqiissuteqarnikkut januaarip aallaqqaataani piareersimanissartik naatsorsuutigigaat’ tunngavilersuutigineqartoq, naalakkersuisoqarfik allappoq.

Taamaammat Brugsenip Pisiffiullu tamanna angumerisinnaassagaat naalakkersuisut nalilerpaat.

Aaqqiissuteqarnissamut piniarfiit ataasiakkaat apeqqutaapput.

Pisiniarfiit ataasiakkaat utertitseriaatsimik nutaamik qanoq aaqqiissuteqarnissaq namminneq aalajangissavaat. Utertitsisarfinni maskiinat namminerluunniit assaat atorneqarsinnaapput. Pisiniarfiillu ataasiakkaat imeruersaatit sorliit ukiup nikinnerani tuninialerusunnerlugit namminneq aalajangissavaat.

Pisiniarfiit ataasiakkaat januaarip aallaqqaataani qanorluunniit aaqqiissuteqaraluarpata qitiusumik utertitsisarfik, puukunik tigoqqaasartussaq, tamanikkussamut piareersimassasoq, naalakkersuisoqarfik tusagassiuutinut nalunaarummi allappoq.

Sulisitsisut allattoqarfianni pisortap, Karsten Lyberth-Klausenip pisiniarfissuit marluk immikkut akuersissuteqarfigineqarnissamik qinnuteqartut KNR-imut novembarimi oqaatigaa. Tassanilu nalunaaruteqarnerat ersarippoq:

- Immikkut ittumik pisoqarpoq, nalunaarut septembarimi aatsaat akuerineqarpoq, malittarisassallu oktobarimi aatsaat piareerlutik. Ulluinnarni atugassanik pisiniarfiit utertitsisarfinnik nutaanik tikisitsinissaminnut piareersaanissaminnullu angummassinnaanngillat. Taamaaliortoqarsinnaanngivippoq, taanna oqarpoq.