Imeruersaatit puuinik utertitsinermi periaasitaalerpugut: Suliaq nammassisassaanngitsoq

Poortuutit pillugit nalunaarut saqqummiunnneqareerpoq, utertitsinermilu periaasissaq inissinneqareerluni.

Pisiniartartullu imeruersaatinik assigiinngitsunik puulinnik nuna tamakkerlugu januaarip aallaqqaataaniit pisisinnanngussapput.

Imaluunniit. Brugsenimmi siunissaq taama isiginngilaa

- Januaarip aallaqqaataa angumerinavianngilarput, tikisitsinissaannut ikkussuunnissaannullu ajornavippoq. Katiternissaa nassiunnissaalu ukiortaartinnagu angumerineqarsinnaanngilaq. Brugsenimi tuniniaanermut pisortaq Jess Nyborg oqarpoq.

Imerpalasut puuinik tigooraavinnik pissarsiniarneq qaammatinik marlunnik sivisussuseqassaaq, taava illoqarfinni Brugseneqarfiusuni tamani ikkussuunnissat tullinnguutissaaq .

Pisiniarfiit namminneq imerpalasut puinik utertitsivissanik pisissapput

Illoqarfiit inuttussusaat aallaafigalugu puiaasanik utertitsissummik tunineqassapput namminerluunniit pisisariaqassasut, ESANI A/S-imiit oqarput.

- Illoqarfiit unammillerfiusuniittut pisiniarfii imeruersaatit puuinik utertitsiveqarnissartik kissaatigigunikku namminneerlutik isumagissavaat, isorliunerusulli puiaasanik utertitsiffilersussavagut.

ESANI A/S-imi pisortaq Frank Rasmussen taama oqarpoq. Taanna massakkut nunatsinni utertitseriaasissaq pillugu nassuiaajartorluni angalavoq.

Puiaasanik utertitsivissat arfineq marlunnik Kangaatsiamut, Qasigiannguanut, Qeqertarsuarmut, Upernavimmut, Tasiilamut Sisimiunullu inniminnerneqarsimasut ESANI A/S-imiit paasissutissiipput.

Kisianni Brugseni Pisiffillu illoqarfinni annerni utertitsivinnik namminneerlutik pissarsisariaqarput.

Taamaatumillu Brugseni maannangaaq maskiinanik utertitsissutissanik pisiortulereerpoq.

Akikinnngillalli.

- Akit ilisimariingikkaluarlugit pisiniarfiinnatsinni fem millioner koruunit sinnerlugit atussagigut oqareersinnaavugut, Jess Nyborg oqarpoq.

Brugsenip pisiniarfiini 16-iusuni aqqaneq marluk puiaasanik utertitsissutitaassapput. Tamarmilli tigooraavinnik ikkussuiffigineqarnissaat isumagineqassallutik.

Kingusinaaqaat

Brugseni piareeruumaarpoq, januaarilli aallaqqaataat angumerinavianngilaat, tamanna suliap kigaappallaamik suliarineqarneranik peqquteqarpoq.

- Allaatigisat, ingerlatseriaaseq, nalunaarusiaq, apeqqutitsinnullu akissutit kingusinaarujussuarput, Jess Nyborg oqarpoq nangillunilu:

- Susoqarnissaanik ilisimasaqaqqaartinnata imeruersaatit puuinut utertitsivinnik pisisinnaanngilagut. Suliassaq maanna piffissaatillugu naammassisinnaanngilarput.

Taamaammat Brugseni, Pisiffik, Sulisitsisullu pingasunngornermi naapissapput. Tassani Avatangiisinut Naalakkersuisoqarfik qanoq iliuuseqaqqussanerlugu oqaluuserissavaat.

- Nalakkersuisoqarfiup qanoq iluarsiisinnaanerluni isummeqqunissaa tassani siunertaraarput. Pisiniarfiutillit nassuiaaniartussaangillat, nalakkersuisoruna naalakkersuisoqarfillu taamaaliortussat.

KNR-ip isornartorsiut Avatangiisinut Naalakkersuisumut Kalistat Lundimut akeqqullugu, taavalu Brugseni aaqqissussinerup atuutilernissaanut angummannaviannginnera oqaaseqarfigequllugu saaffiginnippoq, taannali apersorneqarnissamut maannamut periarfissaqarsimanngilaq-.