Brugseni Pisiffillu suli nalornipput: Puiaasat qillertuusallu uivissutaassasoraat
Nunatsinni niuertut annerpaat utertitseriaatsimut ukiortaami eqqunneqartussamut tunngatillugu akissutinit apeqqutissaqarnerunertik qaammatip ataatsip matuma siornagut tamanit tusarneqarunartumik massuaatigigaat.
Brugseni aamma Pisiffik suliamik qaavatigut suliakkersuutaasussanik utertitassarparpassuarnik tunniussorneqartalernissaminnik ilimasulereerput. Niuertarfiillu suliamut taama atsigisumut piffissaagallartillugu piareersarsinnaagunarnatik oqaatigaat.
Maannalu piffissaarupput. Niuertut annerpaat taakku qangali iliuuseqartoqaqqullugu nilliaateqartaraluarlutik, qaammatit pingasuunngitsulluunniit qaangiuppata utertitseriaaseq eqqunneqartussaq qanoq periuseqarlutik suliarissanerlugu, suli naluaat, taamaammat piareersimaniarlutik apeqqutimik akineqarnissaat piumasaraat.
Tallimanngormat (septembarip 29-ani, aaqq.) puiaasat qillertuusallu sorliit siunissami utertinneqarsinnaassanersut nalunaarutigineqarpoq – kisianni Brugseni Pisiffillu suli paatsuungapput.
Utertitseriaatsimi nutaami qanorpiaq periuseqarluni puiaasat qillertuusallu niuertunit isumagineqartassanersut pillugu Avatangiisinut naalakkersuisoqarfik erseqqissumik paasissutissiinissamut periarfissaqarsimagaluaqaaq. Naalakkersuisoqarfik Brugsenimik utertitseriaaseq nutaaq pillugu septembarip qeqqani aggersaavoq. Ataatsimiinnerli ilimagisatsitut pinngilaq, tuniniaanermut pisortaq Jess Nyborg oqarpoq:
- Paasitinneqarpugut, puiaasat pillugit inatsisissaq kingusinnerpaamik oktobarip aallaqqaataani piariissasoq. Taamaapporlumi. Kisianni aperigatta, taavami qanoq puiaasaq akeqassagami? Apeqqummik akitippugut: Qassilersortikkusukkassigit?
- Soorlu qanorsuarluunniit angissusiliissinnaalluni. Akisussaassuseqanngitsuliorneruvoq, tuniniaanermut pisortaq oqarpoq, Isumaqarportaaq naalakkersuisoqarfimmiut tikilluaqquserpallaarsimanngitsut.
Kingusinaarukkaat
Eqqumiippoq, utertitseriaasissap nutaap eqqunnissaa taama qanitsigilereersoq akigititassanut tunngatillugu aalajangersagaqanngimmat, isummersorpoq. Ajornartorsiutinngoreerpoq, pisiortorfigisartakkattami aamma paasisariaqarpaat.
- Attataasaq tuuginnarlugu aqagu aallartiinnarsinnaanngilagut. Aamma pisiortorfigisartakkatta (puiaasanut qillertuusanullu) atatillugu utertitsinermi akit systemiminnut ilannguttussaavaat, Jess Nyborg oqarpoq.
Brugsenimit aamma ilisimaneqanngilaq, utertitseriaatsimi aningaasat qanoq kaaviiaartinneqassanersut.
Aamma, Brugseni maskiinanik utertitsiffiusinnaasunik, maskiinanik puukoq ikigaanni sequtserisinnaasunik, suli peqalinngilaq.
- Taamaaliunngilagut suli ilisimannginnatsigu sunarpiaq pisariaqartissanerlutigu. Taamaammat aamma Nunatsinni pisiortortarfiit arlaannaalluunniit januaarip aallaqqaataanut piariigaqarsinnaassasoq ilimaginngilara. Piareersimajumaartunik eqqarsartut piviusorsiunngillat, Jess Nyborg oqarpoq.
Nangillunilu:
- Uagut tuniniakkatta puukuisa utertinneqarsinnaasortai tigooqqassallugit pisussaaffeqarpugut. Taamaattumik niuerutissagut ikittunnguutinniarutsigit, pisiniartutta puukut utertitassaat aamma ikinnerit isumagisinnaassavagut.
Paatsiveqanngitsumik suliaasoq
Maanna periusissat imaattussaarpasittoq, tuniniaanermut pisortaq ilisimatitsivoq. Brugsenimut utertitat tigooqqaavimmukaassorneqartassapput.
- Assersuutigalugu puiaasat maani tigoriikkavut akileriikkavullu suleqatitta tigooqqavimmukaatissavai tassanilu maskiinamut allamut ikiorassallugit, taamaasilluni eqqagassalerinermik piginneqatigiiffiup ESANI-p akileriiikkavut utertissinnaaniassammagit.
- Ernumassutigilereerpara paatsiveerusimaarnersuaqarnissaa.
Pisiffik aamma nalornissuteqartutut ilaasoq, pisiortornermut nittarsaassinermut pisortaq Heine Stilling Jensen oqarpoq.
- Oqarsinnaasorivippunga, paatsiveerusimaaqaagut.
- Uku aasaanerani sulinngiffeqarneq aallartinngitsorli apeqqutigaavut. Aamma isumasiorluta aperisarpaatigut. Iluarsiisoqassaaq, immaqaluunnit sussa, allamik aalajangersimanerusumik inissittoqalerpoq, oqartaraat.
Suut-uku paasinissaat pisariaqartinnerpaagit?
- Utertitseriaatsimut atatillugu qanorpiaqqissaaq januaarip aallaqqaataaniit periuseqassanersugut. Ulloq taanna allamut nuussinnaanngilarput, kisianni ulloq taanna aallarnerfigalugu qanoq iliornissarput naluarput, Heine Stilling Jensen oqarpoq.
Brugseni Pisiffillu neriupput, avatangiisinut naalakkersuisoqarfiup piaartumik ataatsimeeqatiseralutik attavigissagaatik.