Esani nassuertoq: Utertitseriaasissap nuna tamakkerlugu atulersinneqarnissaa angumerisinnaanngikkaa

Esani A/S ulluni makkunani utaqqikatappoq.

Nuna tamakkerlugu kiisalu immiaaqqanut sodavandinullu assigiinngitsunut tamanut atorneqarsinnaasoq utertitseriaasissaq nutaaq suliffeqarfik eqqagassaleriffiusup piffissap aalajangersimasup iluani ineriartortinnissaanut suliassaq akisussaaffigisimavaa.

Utertitseriaasissaq nutaaq januaarip aallaqqaataani 2024-mi naammassineqareersimasussaavoq. Sulialli ingerlanneqarnera unittooqqavoq.

Esanimi pisortaq, Frank Rasmussen, KNR-imut taama ilisimatitsivoq.

- Siunnersuutinik piareersimasuuteqarpugut Namminersorlutillu Oqartussanit paasinarsaasoqarnissaa utaqqiinnarlutigu.

Utertitsinermut aki akiligassatut qanoq isumannaarneqassanersoq pingaartumik pineqarpoq, taanna nassuiaavoq.

Piffissakilliortut

Sapaatip akunnera ataaseq marlulluunniit qaangiuppata sukuiaasoqarumaarnera Esani A/S-imi pisortap naatsorsuutigaa.

- Naatsorsuutigisatsitut pissappat taava annerusumik minnerusumilluunniit utertitseriaasissaq nutaap atulersinnissaanut piareersimavugut. Januaarip aallaqqaataani sapinngisamik siammasinnissaa tamakkerlugu atuutilersissavarput.

Esani A/S-ip piffissakilliornera Frank Rasmussenip nassuerutigaa.

- Tamanna qularnanngilaq, taanna erseqqissaavoq.

Tamakkerlugu piareernissaa angumerineqarunnanngitsoq

Utertitseriaatsip nutaap ukiortaaq tikitsinnagu naammassineqarnissaa qanoq piviusorsiortiginersoq pisortaq aperineqarami ima akivoq:

- Januaarip aallaqqaataatinnagu Kalaallit Nunaat tamakkerunnanngilarput.

Taassuma ilanngullugu oqaatigaa Esani A/S maannakkorpiaq sukuiaammik pissarsigaluaruni sumiiffinni amerlasuuni systemi atuutilersissinnaagaluarlugu.

- Kalaallit Nunaata sinnera ukiup 2024-p affaani siullermi tamakkerneqarsinnaalissagaluarpoq.

Sumiiffinni utertitseriaasissap nutaap atuutilernissaanut utaqqiffiusussani puukut pinngortitami takussaalissanersut piffissap takutikkumaarpaa.

Niuertarfeqarfinni nalornineq

Utertitseriaasissaq nutaamut ukiortaami atuutilersinneqartussamut tunngatillugu Brugsenip Pisiffillu ataatsimut tusagassiorfinnut nalunaarumminni suli aallartiffissaqaratik kikkunnut tamanut oqaatigereeraallu Naalakkersuisut nipangersimapput. Apeqqutinut arlalinnut pingaarutilinnullu akissuteqartoqarnissaa niuertarfeqarfiit amigaatigaat.

Niuertarfeqarfiit pisiortorfigisartagaat immiaaqqanik imeruersaatinillu kulsyremik akulinnik nunatsinnut nassiussigaangamik utertitsinermut qanoq akeqartitsisassappat? Utertitsinermut aki kikkunnit akilerneqartassava? Pisiniarfiit puukut sumut nassiuttassavaat? Utertitsinermut aki akiligassatut qanoq isumannaarneqassava? Puiaasanik utertitsiviit pisiniarfinni puunut assigiinngitsorpassuarnut nutaanut pisiniarfiit qanoq naleqqussassavaat?

Apeqqutit qulaani allassimasut apeqquterpassuit akineqarsimanngitsut ilagaat, apeqqutillu taakkua naalakkersuisoq akisussaasumit, Inuit Ataqatigiinneersumit Kalistat Lundimit, akineqarnissaanik periarfissillugu KNR-ip ingerlateqqissimavai. Taassumali apersorneqarumalluni KNR-imit saaffiginnissut suli akisimanngilaa. Utaqqiisaa illuatungiliuttut naalakkersuisut nutaatut utertitseriaasissamik suliaqarnerat isornartorsiorpaat.