Utertitseriaasissamik nutaamik pilersaaruteqartoqanngitsoq: Niuertarfeqarfiit massakkorluinnaq iliuuseqaqqusisut

Qaammatit sisamaannannguit qaangiuppata Nuuk Imeq A/S matussaaq, taamaasilluni immiaaqqanik imeruersaatinillu kulsyremik akulinnik tuniniaanikkut kisermaassinera atorunnaassaaq. Systemili nutaaq atulerneqartussaq suli piareersimanngilluinnartoq niuertarfeqarfiit suaarutigaat.

Allattoq Nicole Sander Bertelsen

aggustip 28-at 2023 18:03

Nutserisoq Sussi Jensen

- Apeqqutit akissutinit amerlanerupput.

Poortuusersuinermut inatsisissaq pillugu Brugseni Pisiffillu ataatsimut tusagassiorfinnut nalunaarumminni taama allapput.

Erseqqinnerusumik oqaatigissagaanni, immiaaqqat sodavandillu sorliit januaarip aallaqqaataani pisiniarfiit ilitsivianniit tigusinnaajumaarneritit puukuilu pisiniarfinnut tunniukkukkit qanoq pisoqarumaarnersoq naluneqarpoq.

Tamassuma pinissaanut qaammatit sisamaannanngorput, piffissarlu sivikitsuinnaq sinnerulluni, niuertarfeqarfiit taama isumaqarput.

- Siunnersuut ammaffigaarput uagut pisisartuvut immiaaqqanik imeruersaatinillu kulsyremik akulinnik soorunami toqqagassaqarnerutikkusukkatsigit.

- Kalaallit Nunaanni politikerit massakkut aalajangeeqquvagut. Massakkut aalajanginngippata januaarip 1-ianni 2024 poortuutit pillugu nalunaarummut tunngasunut sunulluunniit piareersimanavianngilagut – tamannalu pisiortorfigisartakkatsinnut, sulisutsinnut pisiniartartunullu akornutaangaassaaq, ulluinnarni atortussanik pisiniarfiit taakku marluk tusagassiorfinnut nalunaarummi taama allapput.

Naak oqallisigineqaraluarluni unittooqqasoq

Poortuusersuinermut nutaamik inatsisitaarnikkut Nuuk Imeq A/S-ip kisermaassinera atorunnaarsinneqassaaq. 2022-mi decembarimiilli nutaatut inatsisissaq suliarineqalerpoq. Politikkikkulli aalajangiinissat utaqqineqartut pissutaallutik suli nalorninartortaqarpoq.

Aamma atuarukKalistat Lund Nuuk Imeq pillugu: Pisiniarfinni periarfissat amerlanerulissapput

Utertitsinermut aki kia akileqqusassaneraa qanorlu akeqassanersoq, puukut utertinneqarnikut sumut nassiunneqartassanersut kiisalu pisiniarfiit puiaasanut utertitsivii poortuusersueriaatsinut nutaanut qanoq isillutik piareersarneqarnissaat pillugit akissuteqartoqarnissaa niuertarfeqarfiit amigaatigaat.

Ulluinnarni atortussanik pisiniarfinniit apeqqutaasa annertuut nukinginnartullu ilaat tassaavoq malittarisassat nutaat sorpiaassanersut.

Niuertarfeqarfiit apeqqutaat suli akineqarsimanngitsut tamarmik aajuku

Nunanit allanit pisiortortarneq pillugu:

Niuertarfeqarfiit pisiortorfigisartagaat immiaaqqanik imeruersaatinillu kulsyremik akulinnik Kalaallit Nunaannut nassiussigaangamik utertitsinermut qanoq akeqartitsisassappat?
Utertitsinermut aki kikkunnut akilerneqartassava? Akileraarnermut Aqutsisoqarfimmut? Taakkualu systemeqarpat tamatumunnga naleqqussakkamik?
Pisiortorfigisartagaasa systemii Kalaallit Nunaanni utertitsinermut allatut akeqartitsisinnaasunut naleqqussaassapput – taamaaliornissamut piffissaliussaq qanoq sivikitsigissava?

Puukunik pisiniarfiit tigusaannik suliaqarnerannut tunngatillugu:

Pisiniarfiit puukut sumut nassiuttassavaat?
Utertitsinermut aki akiligassatut qanoq isumannaarneqassava?
Puiaasanik utertitsiviit pisiniarfinni 16-iniittut puunut assigiinngitsorpassuarnut nutaanut pisiniarfiit qanoq naleqqussassavaat?

Siunissami niuertarfeqarfiit aningaasaliillutik pisaarisassaattut pilersaarutaannut tunngatillugu:

Puut assigiinngitsorpassuit nutaat tigusinnaajumallugit suliarisinnaajumallugillu puiaasanik utertitsiviit qanoq allanngortinneqassappat/ilassuteqarfigineqassappat?
Aningaasaliilluni pisaartornerit kiap akilissavai? Niuertarfeqarfiit kisimik akiliisuussappata taamalu kinguneranik atuisunut akit qaffallutik?
Danmarkimi pisiortorfigisartagaat Kalaallit Nunaanni tamarmi niuertarfippassuarnut puiaasanik utertitsisarfinnik nassiussinissartik saniatigullu atortussanik ikkussuinissartik angumerisinnaanerpaat?

Allisiguk

Atuisut ajorsartuussasut

Imeruersaatinik 0,25 liiterinit annertunerusunik tikisitsinikkut puunut akitsuutit ullumikkut 3,50 kr.-iupput.

Kalaallit Nunaanni atuisut siornatiguulli 2024-mi immiaarartorlutillu sodavanditortigissappata, niuertarfeqarfiit oqarnerat naapertorlugu, akitsuutigineqalersut 125 millionit koruunit missaanniissapput. Taakkulu atuisartunit akilerneqartussanngussapput, nioqqutissat eqqussat akitsornissaannik ilimasaarneqaqqaarsimanatik.

- Akitsuut nutaaq tamanna politikkikkut atuutitiinnarneqarumavoq, isummerfigineqarumanngilarli, tusagassiorfinnut nalunaarummi taama allassimavoq:

- Naggataatigut atuisoq nioqqutissarpassuarnik nutaanik, ilaatigut niuertarfeqarfiit aningaasaliillutik pisiortugaannik matussutissanut akitsuutinillu nutaanik 125 mio. kr. missaanniittunik, akiliisutuaassaaq.

Nutaarsiassami kukkunermik nassaarsimaguit uunga allaffigineqarsinnaavugut.