Kalistat Lund Nuuk Imeq pillugu: Pisiniarfinni periarfissat amerlanerulissapput
Poortuisarnermut inatsit nutaaq 2024-ip aallartinnerani atuutilerpat maqitsiviup Nuuk Imerup matusariaqalernissani aarleqqutigaaa.
Tusagaq inuit politikerillu assigiinngitsumik qisuariarfigaat. Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Inuit Ataqatigiinneersoq Kalistat Lund, maanna tutsiuppoq.
Taassumalu inatsisissaq iluarisimaarpaa.
AAMMA ATUARUK Nuuk Imermi pisortaq: Nuuk imeq matorataannaavoq
- Maannakkut alloriaqqilerpugut. Imeruersaatit puui utertinneqarsinnaasut amerlanerulersussaapput. aamma Nuuk Imerup oqarsinnaavugut kisermaassilluni taamatut mattutiginnittuunera 2024-p aallartinneraninngaanniit tassunga killeqartussaavoq, taanna oqarpoq, itisiliillunilu:
- Immiorfiit nunatsinniittut sinnerisa namminneq aalajangersinnaalissavaat aamma poortuutit sorliit atussanerlugit. Tassalu kiffaanngissuseqarnerulissapput. Aamma innuttaasut arlaqarnerusunik toqqaasinnaalissapput, poortuutit suulluunnit nunatsinni atorneqarsinnaalernerisigut periarfissat tamakkua amerlatsissinnaassammata.
Iluatsilluartuusoq
Kalistat Lundip Nuuk Imerup matunissamik aarleqquteqarnera uggornartippaa, tamannali poortuisarnermut inatsisiliornermi siunertaanngitsoq erseqqissarpaa.
Nuuk Imeq inatsisissarlu nutaaq:
- Nuuk Imeq immiaaqqanik sodavandinillu maqitsisarfiuvoq Royal Unibrewimit Carlsbergimit aammalu Kommuneqarfik Sermersuumit pigineqartoq.
- Kingusinnerpaamik aappaagu jannuaarip aallaqqaataani inatsit nutaaq atuutilissaaq. Tamannalu puiaasaaqqanik utertitseriaatsimut allannguisussaavoq.
- Imaappoq Nuuk Imerup kisermaassineranut kalluaassaaq sodavandit immiaaqqallu qillertuusanngorpata aammalu utertitseriaaseq allanngortinneqarpat.
- Nuuk Imerup ernummatigaa, suliffeqarfiup matoratarsinnaanera.
- Nuuk Imeq eqqorniarneqanngilaq. Kisianniuna periarfissanik aammalu utertitsisinnaanerup annertunerulerneranik aallaavilimmik suliaqartugut. Immiaaqqat sodavandillu puui kisimik maannakkut utertinneqarsinnaapput. Kisianni siunissami aamma imeruersaatit toqqarneqarsinnaasut amerlanerulersinnerisigut aamma utertitsisinnaanermut periarfissaq annertusineqassaaq, Kalistat Lund oqarpoq, nangillunilu:
- Nuuk Imeq torrallaarujussuarnikuuvoq. Ajunngitsorujussuarmik angusaqarnikuuvoq. Puiaasaaqqat tamakkingajavillugit utertittarnikuuaat, aamma neriuppugut taamatut aaqqissuusseqqinnermi imeruersaatit allat eqqarsaatigalugit taamatut pissuseqassasugut.
Nuuk Imeq ingerlaannassasoq
Puiaasaaqqanik utertitsisarnermik ullumikkut nalunngisatsitut ingerlaannassaaq. Utertitsiviilli poortuutinik assigiinngitsunik maannakkornit amerlanerusunik tigusisalernissaat periarfissaalissaaq.
AAMMA ATUARUK Unamminerusoqarli - Nuuk Imerluunniit suna tamaat akigalugu matutsaalissava?
Tamannalu pisisartunut aningaasanik amerlanerusunik utertitsiviussammat atuisunut naggataatigut iluaqutaassasoq, Kalistat Lund isumaqarpoq.
- Tassa maannakkut suliarineqarpoq, ukiumut 6 millionit koruunit pisisartut akiliutigisartakkagut utertitsinermikkut piffissami aggersumi utertissinnaanngussavaat. Aningaasat taakku maannakkut utertitsisinnaannginnitsinni naliginnaasumik igiinnarneqartaraluarput.
Kalistat Lundip Nuuk Imerup matoratarsinnaanera upperinngilaa.
- Maannakkut tusaasinnaavarput, eqqarsaarnartoqartinneqartoq. Aamma taanna tupinnanngilaq. Siulersuisut suliffeqarfik siulersugartik illersussallugu pisussaaffigaat. Taamaammallu taanna pissusissamisoorpoq. Inuiaqatigiit pingaartitaraarput maani pilersitat soorunami aamma atorluarnissaat. Taanna takussaasorujussuuvoq.
- Taamaallaallu taamatut aaqqiinitsigut nunatta sinnerani maqitsisarfiit, immiorfiit sodavandiliorfiillu siunissami periarfissagissaartinnerulissavagut, taanna naggasiivoq.
