Unamminerusoqarli - Nuuk Imerluunniit suna tamaat akigalugu matutsaalissava?
Nuuk Imerup siunissaa nalorninartorujussuanngorpoq. Immiaaqqanimmi sodavandininillu maqitsinermik kisermaassiunnaartussanngorpoq.
Taamaammat Nuuk Imeq matorarataannaasoq, Nuuk Imerup pisortaa Bernhard Christensen oqarpoq. Tamannalu Nuummi isumasiukkata ilaasa aalassaatigaat.
- Ataannarnissaa pisariaqarpoq, inuppassuarnimmi Nuuk Imeq sulisoqarpoq. Taakkulu akileraartartuupput pilersugaqarlutillu. Nutaarsiassani atuallattaarpara utertitsisarneq pillugu allannguiniarnermi qillertuusat atulersinniarneqartut, tamannalu pinngitsoornani Nuup Imerup sulisuisa eqqorneqaatigissavaat, Storm Ludvigsen KNR-imut oqarpoq.
Kiserngaassineq nunatsinni atugaavallaalertooqqavoq
Puiaasat pillugit nalunaarut nutaaq Inatsisartut novembarimi akuerisaat nunami allamiut suliffeqarfiisa Nuuk Imermut unammillersinnaalernissaannik aamma isumaqarpoq, kalaallit taamaalillutik nioqqutissanik Nuuk Imermeersuinnaanngitsunik pisisinnaalissapput.
Taanna kingsinnerpaamik aappaagu januaarip aallaqqaataani atuutilissaaq.
Nuuk Imeq inatsisissarlu nutaaq:
- Nuuk Imeq immiaaqqanik sodavandinillu maqitsisarfiuvoq Royal Unibrewimit Carlsbergimit aammalu Kommuneqarfik Sermersuumit pigineqartoq.
- Kingusinnerpaamik aappaagu jannuaarip aallaqqaataani inatsit nutaaq atuutilissaaq. Tamannalu puiaasaaqqanik utertitseriaatsimut allannguisussaavoq.
- Imaappoq Nuuk Imerup kisermaassineranut kalluaassaaq sodavandit immiaaqqallu qillertuusanngorpata aammalu utertitseriaaseq allanngortinneqarpat.
- Nuuk Imerup ernummatigaa, suliffeqarfiup matoratarsinnaanera.
Utertitseriaaseq nutaaq aamma atuutilissaaq.
Angutimmarik Kreutzmannillu tamanna ajortussaqartinngilaa. Allanimmi amerlanerusunillu nioqquteqartoqalernissaa nuannaarutigaa.
- Tuniniakkat arlariinngorsinnaappata uanga ajortussaqartinngilara, kiserngaassineq nunatsinni atugaavallaalertooqqavoq, unammillerneq uanga iluaraara iluatigaara, taanna oqarpoq.
Immiaaqqanillu allanik maqitsisartoqalissasoq, taassuma aamma neriuutigaa.
- Pissanganassaaq avataaniit tikittoqassanersoq maaniluunniit sanaartortoqassanersoq, tamannami apeqqutaajumaarpoq. Avataaniit tikittoqassappat, tamanna iluarissagaluarpara.
Sooq?
- Nutaanik aamma pisoqarfiusariaqaratta nunatsinni matoqqasutut ikkunnaarluta.
Sumi tamaani qillertuusakoqarlunilu igalaamineqartarnikuuvoq
Aalisakkanik tunisassiorfiuteqarsimasoq Robert Møller kisermaassineq piunnaarlugu unamminerup tungaanut aamma sammerusunneruvoq.
- Unammillerneq ammartariaqartoq allanillu avataaniit tikittoqartalertariaqartoq isumaqartarpunga, Robert Møller oqarpoq.
Allalli nioqqutigineqalernissaannut utertitseriaatsip nutaap atuutilernissaanut suna tamaat nalilersorluartariaqartoq, taanna aamma isumaqarpoq.
- Massakkut utoqqaliarsaalerpunga, eqqaamavaralu Sisimiuni taamani meeraagallaratta puiaasaaqqanik utertitsisoqartanngikkallarmat nunatsinni sumi tamaani igalaaminernik ulikkaarnikuuvoq, Robert Møller oqarpoq.
Nuuk Imeq 50-inik sulisoqarpoq, suliffeqarfillu matuinnassaguni sulisut atorfitsit aamma annaassavaat.
Puiaasanut inatsit nutaap utertitseriaatsillu qaqugu atuutilernissaannut suli ulluliisoqanngilaq.
- lnatsisartut aalajangiiffigisassaattut siunnersuut: "Utertinneqarsinnaasutut Naalakkersuisunit akuerineqarsimappata immiaaqqat sodavandinillu qillertuusanik, plastikkinik igalaaminernillu puullit, ilusaat angissusaallu apeqqutaatinnagit, nunatsinni tamani tunineqarsinnaatinnerisigut Nuuk Imiup kisermaassinerata atorunnaarsinneqarnissaa siunertaralugu immiaaqqat imeruersaatillu kulsyrinik akullit puui pillugit malittarisassanik nutaanik kingusinnerpaamik 1. januar 2024-mi aalajangersaanissamik Naalakkersut peqquneqassasut".
