Illuatungiliuttut uissuummisut: Naalakkersuisut tungaanniit pikkorliornerujussuuvoq

- Tamassuma tulluanngitsuunerata saniatigut Naalakkersuisut pilersaarutinik naammassinninnissaminnut qanittumiinnginnerat pikkorliornerujussuuvoq.

Ataasinngormat Brugsenip Pisiffillu pisortatigoortumik ataatsimut nalunaarutaat pillugu Demokraatit siulittaasuat, Jens-Frederik Nielsen, taama isummernermini aallarniivoq. Utertitseriaasissamut nutaamut ukiumi nutaami atuutilersinneqartussamut tunngatillugu nakkutilliisoqarpallaannginnera tamassuma ersersippaa.

Niuertarfeqarfiit pisiortorfigisartagaat immiaaqqanik imeruersaatinillu kulsyremik akulinnik nunatsinnut nassiussigaangamik utertitsinermut qanoq akeqartitsisassappat? Utertitsinermut aki kikkunnit akilerneqartassava? Pisiniarfiit puukut sumut nassiuttassavaat? Utertitsinermut aki akiligassatut qanoq isumannaarneqassava? Puiaasanik utertitsiviit pisiniarfinni puunut assigiinngitsorpassuarnut nutaanut pisiniarfiit qanoq naleqqussassavaat?

Utertitseriaasissap nutaap eqqunneqarnissaanut qaammatillu sisamaannanngortut apeqqutit taakku akineqanngitsorpassuit akineqarnissaat utaqqineqarpoq.

- Utertitseriaasissap nutaap Naalakkersuisunit piareerneqannginnissaa ernumassutigilluinnarpara. Taamatut isikkoqarnera uggornarpoq, Naalakkersuisullu sukkanerujussuarmik sulinissaat taamaallaat oqaaqqissaarutigisinnaavara, Jens-Frederik Nielsen oqarpoq.

Ilungersunartumik tigujuminaatsoq

Naalakkersuisut maannakkut ulappupput, tusagassiorfinnummi akissutissartik suliaraat.

Avatangiisinut Naalakkersuisup, Inuit Atatigiinneersup Kalisat Lundip, apersorneqarumanermini allakkatigut akissutaani tamanna oqaatigineqarpoq.

Utertitseriaasissamik nutaamik Naalakkersuisut suliaqarneranni amigartumittaaq ingerlassinerat maannakkut pisut nalaanni Naleqqap siulittaasuata, Pele Brobergip, assuaraa.

- Taamatut sattaaserluni suullu tamarmik ajunngitsumik ingerlaannarnissaannut naatsorsuuteqarnikkut ingerlaannartoqarsimanera paasisinnaanngilara, taanna oqarpoq ilanngullugulu oqaatigaa pissutit amerlasuut tunngavigalugit Naalakkersuisut sulinerat Naleqqap ilumoorsaartumik isigiuminaatsikkaat.

Assersuutigalugu taamanikkut Nuuk Imeq illersorniarlugu poortuusersuinermut akitsuutip maannakkut peerneqarnissaanut iliuuseqartoqarsimanngilaq. Tamanna atuisunut eqquisussaavoq pissutigalugu imeruersaatinik tikisitsinermi puumut ataatsimut akitsuut 3,50 koruuniummat, immiaaraagaluarpat, juicejugaluarpat, sodavandiugaluarpat saftiugaluarpalluunniit.

Paasinninngilluinnartoq

Niuertarfeqarfiit puunik isumaginnissinnaanngornissaat qulakkeeqqaartinnagu nutaamik utertitseriaaseqalertoqarnissaa partiit akuerisimagaat minnerunngitsumillu Dansk Returpantsystemip nunatsinnik suleqateqarnissaminik soqutiginnera, taamatulli isikkoqarpasinngitsoq, Pele Brobergip ”assut eqqumiigaa”.

Nutaamik utertitseriaasitaarnissap atuutilersinneqarnissaa sooq taama arriitsigisumik ingerlanersoq Demokraatit siulittaasuata paasisinnaanngilluinnarpaa.

- Inuussutissarsiutip aamma ulluinnarni atortussanik pisiniarfiit nalorninartumiitinneqarnerat neriunartoqanngilluinnarpoq. Tamanna akuerineqarsinnaanngilluinnarpoq.

- Suliaq aallussiuk, aaqqiissutissamik nassaarlusilu utertitseriaasissaq atuutilersinniarsiuk, Jens-Frederik Nielsen Naalakkersuisunut taama noqqaassuteqarpoq.

Taassuma Demokraatillu nutaamik utertitseriaaseqalernikkut avammut ammanerulersitsinissaq isumassarsiatsialattut isigaat. Taamaattorli taanna oqarpoq:

- Naalakkersuisut nutaamik utertitseriaaseqalersitsinngippata poortuusersuinermut suliassaqarfiup avammut ammanerulersinneqarnissaa angusinnaanngilarput.

Atassut siulittaasuat, Aqqalu Jerimiassen, KNR-ip oqaaseqartinniaraluarsimavaa, taannali KNR-ip saaffiginnissutaanut suli akissuteqarsimanngilaq.