Eqqarsarluarneq: Innuttaasut tamarmik puiaasaatitik ukiortaamiit utertittalissavaat
Naalakkersuisoq unnuami sinilluartaqaaq. Nalunngilaami puukunik utertitseriaasissaq nutaaq, ukiortaartinnagu tamakkiisumik atuutilersinneqarsinnaassanngitsoq. Kisianni angumersissaagut, Kalistat Lund oqarpoq.
Taama neriorsuivoq, Brugseni Pisiffillu ataatsimoorlutik tinnersaareersullu, oqarlutik: Niuernermik suliallit maannangaaq paasisariaqarpaat, pisiniarfiit poortuutit pillugit nalunaarut nutaaq atuutilersinnagu piareersimasinnaanerlutik. Puukunik utertitseriaaseq pineqarpoq. Apeqqutit akissutiniit amerlanerupput, oqarput.
Niuertarfiit ilaatigut paaserusutaat tassaavoq, utertitsinermi aki kia akileqqusassaneraa, qanoq utertitat akeqartassanersut, utertitat poortoriikkat sumut nassiunneqartassanersut qaqugulu puukunut assigiinngitsorpassuusussanut utertitsisarfissat nutaat piariissanersut.
Naalakkersuisut inuussutissarsiutilinnik utaqqisitsinerat akuerineqarsinnaanngilaq, oqarput. Taama oqarnerannut Kalistat Lund ima akissuteqarpoq:
- Kikkut tamaasa naammaginnilersikkusukkaluarpavut, kisianni taamaappasinngilaq.
Aallartissaqqaarpoq
Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfiup Dansk Returpantsystem suleqatigilerniarlugu piffissarujussuaq atorsimavaa. Piffissaq ingerlalertorsimavoq, suleqatigiinnissamillu isumaqatigiissusiortoqanngitsoorluni. Taamaaleriarmat Kalaallit Nunaanni utertitseriaasissamik nutaamik nammineq peqalernissaa sulissutigineqalerpoq.
- Suliaq aallartereerparput. Tusarniaaneq aggutsip 28-anut naavoq, nalunaarullugu oktobarip aallaqqaataani naammassisussaq suliaralugu aallartinneqareerluni, Kalistat Lund ilisimatitsivoq.
Esani A/S-imi pisortap Frank Rasmussenip ippassigami aalajangersimasumik oqaatigaa: Utertitseriaasissap nutaap januaarip aallaqqaataatinnagu nuna tamakkerlugu atuutilersinnissaa angumerineqarsinnaanngilaq.
Taamaakkaluartoq innuttaasunut ataasiakkaanut soqutaassanngilaq, Siorapalummiikkunik, kangiani Ittoqqortoormiuniikkunik kujataanilu Narsamiikkunik, ukiortaami puukunik utertitsissaassapput.
- Innuttaasut januaarip aallaqqaataani utertitsisinnaassapput. Pinngitsooratik, Kalistat Lund oqarpoq.
Iluarsissavarput
Innuttaasunut tamanut neriorsuutigisinnaaviuk, nalunaarut nutaaq atuutiliinnartorlu, puukunik sumut taamanga eqqakkanik takussaasoqarnaviannginnera?
- Aap. Taannamiuna qulakkeerniarlugu sulisunga.
- Arlaatigut iluatsinngitsoortoqassappat, taava immikkut ittumik akuersissusiorumaarpugut, Kalistat Lund oqarpoq.
Pisariaqalersinnaanera eqqoriareersinnaagakku?
- Arlaat nalunaassagaluarpat puukunik tigusisinnaanatik, taava aaqqiissuteqaqataassaagut. Sunaluunniit nutaaq aallartikkaanni, ilimaginngisamik pisoqarsinnaasarpoq, Kalistat Lund oqarpoq.
Naalakkersuisut utertitseriaasissamut atatillugu pilersaarutit malillugit oktobarip aallaqqaataani nutaamik nalunaaruteqarumaarput.
