Naalakkersuisut: Oktobari sioqqullugu utertitseriaasitaarnissamut nutaamut suli paasissutissaqassanngitsoq

Ukiup nutaap aallartinneraniit atuisut sodavandinik immiaaqqanillu sorlernik pisisinnaanngornissaannut puiaasanullu akilerallakkap qanoq annertussuseqarnissaanut Naalakkersuisut paasissutissiinissaminnut piareersarnertik suli piffissamik atuiffigilaassavaat.

Allattoq Hanna Vestergaard Hviid

aggustip 31-at 2023 15:25

Nutserisoq Sussi Jensen

Ulluni kingullerni naalakkersuisut isornartorsiorneqangaatsiarsimapput pissutigalugu ukiup nutaap aallartinnerani puukunik utertitseriaasissaq atuutilerpat qanoq pisoqassanersoq tamanit naluneqarmat.

Paasisaqarfiginissaanullu utaqqilaaqqittariaqarpugut.

Naalakkersuisut tusagassiorfinnut nalunaarummi allapput nalunaarutip nutaap oktobarip aallaqqaataani naammassereerneqarsimassasoq naatsorsuutigalugu. Tassa qaammat ataaseq qaangiuppat.

- Nunatsinni puukunik utertitsisarneq aallartisarniarlugu pilersaarusiorneq siuarsimasorujussuvoq, qilanaarivaralu pisiniarfinnut innuttaasunullu saqqummiunnissaa, Nunalerinermut, Imminut Pilersornermut, Nukissiuuteqarnermut Avatangiisunullu Naalakkersuisoq, Kalistat Lund, oqarpoq.

Nalunaarummi nutaami imeruersaatit puui utertitsisarnermi sorliit utertitseriaatsimut nutaami ilaatinneqassanersut takuneqarsinnaassaaq. Tassa, sodavandit immiaaqqallu sorliit ukiortaamiit pisiniarfiit ilitsivianni toqqagassarilissaneritit.

Utertitsisarnermik aaqqissuussinermi imeruersaatit puui assigiinngitsut sapinngisamik amerlanerpaat ilaatinneqassasut Kalistat Lundip ilisimatitsissutigaa.

Imeruersaatit puui pillugit inatsit nutaaq

Imeruersaatit puui pillugit nalunaarutip utertitsisarnermilu aaqqissuussinerup allanngortinneqarnissaannik Inatsisartut Naalakkersuisunut 2022-mi ukiakkut peqqusipput.

Allannguutit kinguneraat januaarip aallaqqaataaniit immiaaqqat, sodavandit imeruersaatillu kulsyrinik akullit allat ullumikkumut sanilliullugu annertuninngorlugit tunineqarsinnaassasut, puullu assiginngitsut amerlanerit ullumikkumut sanilliullugu atorneqarsinnaassasut.

Peqatigitillugu aalajangerneqarpoq utertitsisarnermi aaqqissuussinermi gas-inut puiaasat puiaasallu plastikkit utertinneqartarnissaat Naalakkersuisunit isumagineqassasoq.

Niuertarfeqarfiit isornartorsiuingaatsiartut

Naalakkersuisut utertitseriaasissamik nutaamik piareersimasuuteqannginnerat sapaatip akunnerata uuma aallartinnerani niuertarfeqarfiit isornartorsiorpaat.

Utertitsinermut aki kia akileqqusassaneraa qanorlu akeqassanersoq, puukut utertinneqarnikut sumut nassiunneqartassanersut kiisalu pisiniarfiit puiaasanut utertitsivii poortuusersueriaatsinut nutaanut qanoq isillutik piareersarneqarnissaat pillugit akissuteqartoqarnissaa Brugsenip Pisiffillu amigaatigalugu ataatsimut tusagassiorfinnut nalunaarumminni oqaatigaat.

Aamma atuarukUtertitseriaasissamik nutaamik pilersaaruteqartoqanngitsoq: Niuertarfeqarfiit massakkorluinnaq iliuuseqaqqusisut

Ippassarlu KNR-ip oqaatigisinnaasimavaa Esanip, nutaamik utertitseriaasiortussap, nuna tamakkerlugu januaarip aallaqqaataani utertitseriaaseq nutaaq naammassereersinnaanngikkaa. Taakkuami Namminersorlutik Oqartussanit paasissutissat aamma amigaatigaat.

Naalakkersuisut tusagassiorfinnut nalunaarumminni isornartorsiuisoqarnera eqqaanngilaat, utertitsinermili atortorissaarutit atorneqartartut amerlasuut ukiortaareernerata kingorna atorneqaannarsinnaasut naatsorsuutigineqartoq allassimavoq.

Akitsuutit allanngortinneqassanngitsut

Niuertarfeqarfiit isornartorsiutaasa ilaat tassaavoq imeruersaatinik 0,25 liiterinit annertunerusunik tikisitsinikkut puunut akitsuutit ullumikkut 3,50 koruuneqarnerat.

Brugsenip Pisiffillu oqarnerat naapertorlugu atuisut siornatiguulli 2024-mi immiaarartorlutillu sodavanditortigissappata akitsuutigineqalersut 125 millionit koruunit missaanniissapput.

Atuisunullu tamanna akisussaaq

Aamma atuarukEsani nassuertoq: Utertitseriaasissap nuna tamakkerlugu atulersinneqarnissaa angumerisinnaanngikkaa

Naalakkersuisulli taama isumaqanngillat. Tusagassiorfinnut nalunaarutaanni allassimavoq akitsuutit qaffasissusiat atuuttoq januaarip aallaqqaataaniit ingerlatiinnarneqassasoq.

- Taamatut naliliineq Nuuk Imiup 1. januarip kingorna unammillersinnaannginnerminnik naliliineranit taperserneqarpoq, naak immiaaqqamut ataatsimut akitsuutinik 3,5 kroninik akiliisanngikkarluarlutik. Tamassuma takutippaa akit puunut akitsuutit kinguneranik qaffannavianngitsut.

Niuertarfeqarfinnut aningaasat

Utertitseriaaserli nutaaq atuutilersinneqarpat pisiniarfiit annertuumik aningaasaliinissaat naalakkersuisut pinaveersaartikkusuppaat.

Taamaattumik Naalakkersuisut naatsersuutigaat maskiinanik nutaanik utertitanut katersuiffiusussanik pisiortornermut 5,5 millionit koruunit atorneqassasut, 2024-mullu Aningaasanut inatsisissatut siunnersuummi utertitsisarnermik aaqqissuussinerup nutaap aallartilluarnissaa qulakkeerniarlugu 10 millionit koruunit saniatigut immikkoortinneqarput.

Aningaasat taakkua imeruersaatinik tikisitsinermi akitsuutinut taarsiutaassanersut tusagassiorfinnut nalunaarummi taaneqanngilaq.

Kisianni utertitsisarnermi aaqqissuussinermik ingerlatsinermut imeruersaatit puui ataasiakkaat pisiniarfinnit akilerneqartassapput. Pisiniarfiit aaqqissuussinermik ingerlatsinermi ingerlaavartumik aningaasartuutaannik taarsiissuteqartalernissartik Naalakkersuisut neriuutigaat.

Nutaarsiassami kukkunermik nassaarsimaguit uunga allaffigineqarsinnaavugut.