Brugseni Pisiffillu immikkut akuerineqarnissamik qinnuteqartut: Utertitsiviit nutaat marsimi aatsaat piareersinnaagaat
Immiaaqqat sodavandillu assigiinngitsut tamarmik nunatsinni ulluinnarni atortussanik pisiniarfinni januaarip aallaqqaataaniit utertinneqarsinnaalertussaagaluarput.
Pisiniarfissuarnili marlunni Brugsenimi Pisiffimmilu tamanna periarfissaasussaarpasinngilaq. Taakku Avatangiisinut Naalakkersuisoqarfimmut immikkut akuerineqarnissamik maanna qinnuteqartut, Sulisitsisut allattoqarfianni pisortaq, Karsten Lyberth-Klausen nassuiaavoq.
- Taakku utertitseriaatsip nutaap piffissami kingusinnerusumi atuutilerneqarnissaanut immikkut akuerineqarnissamik qinnuteqarput. Tamanna utertitseriaatsip nutaap tunngaviata tamarmi pisiniarfinnut kingusissukkut aatsaat takkunneranik pissuteqarpoq, tamannalu angumerineqarsinnaanngilaq.
Imeruersaatit puiaasartaat pillugit nalunaarut nutaaq naapertorlugu naalakkersuisut ’immikkut ittumik pisoqarnerani’ immikkut akuersissuteqarsinnaapput. Uanilu tamanna pineqartoq, Karsten Lyberth-Klausen isumaqarpoq.
Ulluinnarni atugassanik niuertarfiit ukiup nikinnissaanut arlaatigut piareersimasinnaanissartik pissutigalugu malittarisassat nutaat kingusinnerpaamik septembarip aallaqqaataani piareersimanissaat naalakkersuisoqarfimmut paasissutissiissutiginikuugaat, taassuma ilanngullugu erseqqissaatigaa.
- Immikkut ittumik pisoqarnera uaniippoq, nalunaarut septembarimi aatsaat akuerineqarpoq, malittarisassallu oktobarimi aatsaat piareerlutik. Ulluinnarni atugassanik pisiniarfiit utertitsisarfinnik nutaanik tikisitsinissaminnut piareersaanissaminnullu angummassinnaanngillat. Taamaaliortoqarsinnaanngivippoq, taanna oqarpoq.
Tassa imaappoq pisiniarfiit immikkut akuersissummik tunineqanngikkunik imeruersaaterpassuit januaarip aallaqqaataanit nassaassaajunnaassapput.
Puiaasat utertitsiveqaratik tigoqqarusunngikkaat
Avatangiisinut naalakkersuisup, Kalistat Lundip (IA) Brugsenip Pisiffiullu januaarip aallaqqaataanut piareersinnaannginnerat uggoralugu KNR-imut allakkatigut akissutigaa.
Tamatuma saniatigut pisiniarfiit utertitsiviit piareernissaannut allatut periarfissaqartut erseqqissaatigaa.
- Immiaaqqat sodavandillu nunatsinni utertinneqarsinnaasutut ilisimaneqartut suli pisiarineqarsinnaassapput, taakkulu utertitsivinnut pisiniarfinniittunut utertinneqarsinnaapput. Aamma utertitsiviit atorlugit utertitsinngikkaluarluni tigoqqaasoqarsinnaavoq, taanna allappoq.
Pisiniarfiilli utertitsiveqartigatik puiaasanik tigoqqaarusunngitsut, Brugsenimi niuernermut aningaasaqarnermullu pisortaq, Jes Nyborg oqarpoq.
- Pisiniarfiup ammanerani utertitsisussanut piareersimasoqaannavittariaqassaagut. 16-inik pisiniarfiuteqarpugut, pisiarfiillu siulliit ullaakkut arfinernut ammartarput, ilaallu unnuap-qeqqanut matusarlutik. Taamaammat sulisumut akunnerpassuit atussavagut, taanna oqarpoq.
Tamatuma saniatigut utertitsiviunngitsumut utertitsinermi sianiinaarisoqarnissaa ajornanngippallaarujussuassaaq, taanna oqarpoq.
- Puiaasat uppernarsaataat ullumikkut immikkuullarissuupput, taakku namminneq stregkodeqarput. Kisianni 25 koruuni allallugu – immaqa naqitsissummik – assiliartaliunneqarnissaa ajornanngitsuarannguussaaq.
Taamaammat Jes Nyborgip Kalistat Lundip nalunaarutaa isumaqatigivallaanngilaa.
- Sulisumik allattuivilersitsilluta sulisoqaannarsinnaasugut oqarneq uniuuttuusoraara. Ukiunik 30-nik kingumut uteqqissasugut politikkikkut kissaatigineqarpat taava isumaqarpunga tamanna nalunaarutigissagaat. Aamma naak tassani qaammat ataasiinnaq pingasuinnaalluunniit pineqaraluarpata, niuernermut pisortaq oqarpoq.
Marsimi aatsaat piariivissasut
Pisiarfeqarfiutillit taakku marluk utertitsivinnik piaartumik piareersitsiniarniarlutik immikkut akuersissuteqartoqarnissaanut qinnuteqaamminni allapput. Kisianni immikkut akuersissummik 2024-mi marsip 31-ata tungaanut atuuttussamik qinnuteqarlutik aamma allapput.
Pisiniarfiimmi piareernissaannut piffissamik atuisoqassasoq, Sulisitsisunit, Karsten Lyberth-Klausen oqarpoq.
- Utertitsiviit piareerpata immikkoortukkaarlugit aallartissinnaavagut, taamaalilluta illoqarfinni ataasiakkaani aallartiaarnerulluta. Immaqa illoqarfiit ilaanni januaarimi februaarimilu piareertoqarsinnaavoq, sinnerilu kingusinnerusukkut, taanna oqarpoq, nangillunilu:
- Piffissamik kingusinnerpaaffissaliivugut, taamaalilluta pisiniarfinni tamani atuutsilersinneqarsinnaanissaat qulakkiissallutigu.
Brugsenip utertitsiviit nutaat aqqaneq-marluk – qillertuusanillu eqiteriviit nutaat – pisiniarfiutimini piareersassavai, Pisiffiullu utertitsiviutitik 24-t taarsissallugit.
KNR-ip avatangiisinut naalakkersuisoq, Kalistat Lund (IA) oqaaseqartinniarsaraa.
