Brugseni puukut pillugit: Erloqinarpoq
Utertitseriaaseq nutaaq januaarip aallaqqaataani atuutilersussaq pillugu erseqqissumik suli paasissutissiisoqarsinnaannginnera erloqinaqaaq.
Brugseni, qaammatit sisamat qaangiuppata qillertuusat puiaasallu qanoq akeqartittalernissaannik aamma utertitat qanoq pineqartalernissaannik periusissiamik, ujartuivoq.
- Nuuk Imeq matussallugu aalajangeramilli naalakkersuisut pilersaarusiorsimannginnerat eqqumiigilluinnarpara. Ingammillu aatsaat pilersaarusiorneq aallartissimagitsik oqarmata, Brugsenimi pisortaq Susanne Christensen oqarpoq.
Brugseni Pisiffillu ataatsimoorlutik politikerinut aaqqiissuteqarnissaannik kajumissaarinertik una sapaatit akunnerat aallartilaartoq tusartippaat.
Piareerniarlugu sulisoqarpoq
Niunermilli suliaqartut suli qaammat ataaseq utaqqisariaqarput.
Naalakkersuisut poortuutit pillugu nalunaarut nutaaq oktobarip aallaqqaataani aatsaat piariissangatippaat. Najooqqagassat poortuutaat sorliit, qillertuusat puiaasallu, tigooqqarneqartalissanersut, qanorlu periuseqarluni utertitalerisoqartalissanersoq nalunaarummi erseqqissaatigineqassaaq.
Kalistat Lundip (IA) Nunalerinermut, Imminut Pilersornermut, Nukissiuutinut Avatangiisinullu Naalakkersuiaup oqarnera naapertorlugu naalakkersuisut nalunaarut utertitassalerimut tunngasoq naammassiniarlugu ulapputigaat.
Niuernermik sulialinnut pilersaarusiorsimannginneq ilumut naapertuuttuunersoq aperineqarami ima akivoq:
- Kikkut tamaasa naammaginnilersikkusukkaluarpavut, kisianni taamaappasinngilaq, KNR-imut sisamanngornermi oqarpoq.
Niuertarfiit: Akit qaffassapput
Niuernermik suliaqartut uparuagaasa ilagaattaaq, najooqqagassanut atatillugu puiaasaq qillertuusarluunniit nunatsinnut eqqunneqartoq 0,25 literimit annerusoq 3,50 koruunimik politikerit akitsuusiinialersaarnerat.
Brugsenip Pisiffiillu naatsorsuutigissavaat akitsuutinut 125 millioner koruuninik siunissami akiliinissartik, pisisartut immiaaqqanik sodavandinillu siorna pisiaattut amerlatigisunik 2024-mi pisitigissappata.
Kalaallit Nunaanni imeruersaatit maqitat puui immikkut manna tikillugu akitsuusersorneqarsimanngillat, nunatsinni maqitaammata nunatta avataaniunngitsoq.
- Ilimagisinnaavarput, nioqqutit akitsornerat pisisartutsinnut malunniutissasoq, naak nunani allani akikinnerusumik pisiarineqarsinnaagaluartut. Poortutaasa akitsuuserneqarnerat akitsuinermut pissutaanerpaassaaq, Pisiffimmi allaffissornermi pisortaq Per Steen Larsen KNR-imut allakkatigut akissuteqarnermini eqqoriaavoq.
Allannguineq sodavandinik immiaaqqanillu pisinitsinni malunnarnerpaassaaq, taakku akitsornerpaassammata, tamannalu nunatta karsianut 100 aamma 130 millioner koruuninik akiliinerusalernissatsinnik kinguneqassaaq.
- Misilittakkalli takutereerpaat, imigassanik aalakoornartulinnik atuineq, akitsuusiinerit akinillu qaffaanerit pigaangata, millisartoq, taamaalisoqaraangallu inuiaqatigiinni peqqissuseq ilorraap tungaanut aallarsinnaasartoq, nangippoq.
Naalakkersuisut: Akinik qaffaasoqarunnanngilaq
Brugseni Pisiffiup oqaasiinut isumaqataavoq.
- Naalakkersuisut pilersaarutaat pissanganaqaaq. Neriuppunga pisisartunut iluaqutaasussamik aalajangiissasut.
- Pisisartummi akileeqqiinnarumaarput. Akiligassarmi ataasiinnarmut uagut nassiuttussaavarput, Susanne Christensen oqarpoq.
Pisortaq nangippoq:
- Imaassinnaavoq septembarip naanerani saqqummiussassaq pilersaarutitsialaassasoq. Naluarpulli. Taama kingusinaarutsitsiginissaa erloqinarpoq, oqarpoq.
Naalakkersuisut oqarnerat naapertorlugu akitsuut nioqqutinik akisunerulersitsinavianngilaq, naak niuernermik suliallit taama ilimasulereeraluartut.
- Naliliineq, Nuuk Imerup, januaarip aallaqqaataaniit 2024-miit akinut unammillersinnaajunnaarnissamik ilimasunnermik tunngaveqarpoq. Uffa Nuuk Imeq najooqqagassap poortuutaanut ataatsimut atatillugu 3,5 koruunimik akitsuuserneqarnavianngikkarluartoq. Tamakku tamarmik takutippaat, akitsuusiinerit kingunerisaannik akit qaffannavianngitsut, naalakkersuisut tusagassiorfinnut sisamanngornermi nalunaarput.
