Nunatsinni isorliunerusuni pisiniarfiit puiaasanik utertitanik ulikkaartoorsinnaasut
Utertitseriaaseq tusaamanerlunneqartoq 2023-mi akerleriissutaasoq maanna inissinneqarpoq. Imaluunniit inissipajaarpoq. Naallu nunatsinni pisisartut immiaaqqanik sodavandinillu assigiinngitsunik amerlanerusunik ullumikkut toqqaasinnaaleraluartut piniarfiit puiaasanik utertinneqartunik aserorterinissamut immikkoortiterinissamullu maskiinanik nutaanik inissiillutik suli piariinngillat.
Pisiniarfiillu puiaasanik imaqanngitsunik tigoqqaasussaapput. Taamaammat utertitassalerisut puiaasanik qillertuusanillu assatik atorlugit utertitsisitsisarput.
ESANI A/S-ilu pisiniarfinnit puiaasanik tigunissamut suli piariinngilaq.
Eqqagassalerisut utertitassanik tigoqqaanissamut sapaatip akunnerata ingerlanerani aatsaat piariissapput – tamannalu Nuummi pisiniarfinneersunuinnaavoq. ESANI A/S-immi puiaasat sineriammeersut sapaatip akunnera 3-mi aatsaat tigoqqarsinnaalissavai.
ESANI A/S-imi pisortaq, Frank Rasmussen KNR-imut paasissutissiivoq.
- Piffissami matumani pisiniarfippassuit namminneq maskiinassaminnik ikkussuinialeruttorput. Ikkussuisimalereerpata uagutsinnut tunniussinissamut pisariaqartitsineq maannakkutulli pisariaqartigiunnaassaaq, taanna oqarpoq.
Puiaasat imaqanngitsut toqqorsivimmiitinneqartut
Nassuiaatigineqartorlu ajornaatsunnguuvoq, tassa puiaasat qillertuusat, plastikkit igalaamerngillu aserorterneqarunik taakku inikinnerulissapput.
Nunatsinnimi isorliunerusuni pisiniarfinni maskiinanik aserorterutaasinnaasunik atortoqalertussaarpasinngitsuni?
- Tassani (utertinneqartut aaqq.) puussianut katersorneqassapput, taakku ilikkaaraangamikkit ESANI-p aallernissaata tungaanut toqqorsivimmiitsittassavaat, Frank Rasmussen nassuiaavoq, taassumalu puiaasat, qillertuusat igalaamerngillu ullut tamaasa aaneqartarnavianngitsut nassuerutigaa.
Toqqorsinissamut periarfissaqassasoq
ESANI A/S-ip puiaasat tunngaviusumik qaammammut ataasiarluni aasarniarpai. Kisianni, nassuerutiginnippoq:
- Sumiiffiit ilaanni utertitat ukiup affaani tikillugu toqqoqqanertaqariaqassapput. Ittoqqortoormiini immaqa qaammatit qulingiluat, Frank Rasmussen oqarpoq, taassumalu immap sikusarnera imaatigut angallannermut aporfiliisartoq innersuutigaa.
- Toqqorsivissatut periarfissat misissorneqassapput. Pilersuisoq peqatigalugu taamaaliussaagut.
Initussanngillat?
- Ilumut, kisianni Nuuk Imermut utertitanik toqqortaqarnissaq sungiusimaneqareerpoq. Initunerunavianngillat, kisianni qularnanngilaq aaqqitassamik suliassaqartoq.
