Tarnip pissusianik ilisimasalik spiralilersuisoqarnera pillugu: Arnat kingunerluuteqarnertik misigeqqippaat
Elisibánguak' Jeremiassen 13-iinnarnik ukioqarluni – kalaallit arnat tusindilikkaat assigalugit – spiralilerneqarpoq.
Ukiullu 47-t nipangersimasoqareersoq – DR-ip tusarnaagassiaminik Spiralkampagnenimimk pisimasoq saqqummersimmagu arnarpassuit maanna ikiorneqalerput. Aamma Elisibánguak'.
Taanna ilaqutariinnut katsorsaasumut innersuunneqarsimalluni, KNR-imut ippassaq oqaatigaa.
Spiralilersuisoqarsimanerami pillugu saqqummersut arnat ukiorpassuit pigisimasaannik, ikitoqqanik kingunerluutinillu qaffakaatitseqqittut, tarnip pissusianik ilisimasallip, Naja Lund Kielsenip oqaatigaa.
Tusarnaagassiaq Spiralkampagnen
Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip ”Spiralkampagnen”-imik taallugu podcastimik tusarnaagassiliareqqammisaani erserpoq.
- 1966-ip 1975-illu akornanni kalaallit niviarsiaqqat arnallu tuusintilikkaat spiralilersinneqarput.
- 1966-ip 1970-illu akornanni spiralilersinneqartut 4.500-upput.
- Kalaallit Nunaanni arnat naartusinnaasut taamani 9000-upput.
- Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
- Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq.
- Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat.
Tusarfik: DR-podcast "Spiralkampagnen"
- Kanngusunneq, sooruna uanga taama pineqartunga, taavalu oqaasinnguisinnaanissamut immaqa aamma nalorsartilluni, inorsartilluni qisuariaatsit assigiinngitsuusinnaasarput, tarnip pissusianik ilisimasalik KNR-imut oqarpoq.
AAMMA ATUARUK Arnat kinguaassiutaannut nakorsap arnat misissortakkamik ilaat spiralimik suli nassaarfigisarai
- Meeqqap spiralilerneqarnera killissamik qaangiingaatsiarneruvoq. Tamanna naapertuilluanngitsuliortoqarneratut misigineqarsinnaavoq, taamaalillunilu kingunerluuteqartitsilluni. Pingaartumik meeqqat kinguaassiutitigut inerinneqanngitsoq aamma misilittagaqanngitsut spiralilerneqarnertik qanoq qisuariarfigissanerlugu naluaat.
Kiserliorneq kanngusunnerlu
Arnat ilaasa misigisimasartik sivisoorujussuarmik aniseqqasimallugu misigaat. Qanoq taamaattoqarsinnaava?
- Inuit sakkortuumik misigisaqaraangamik assigiinngitsorujussuarmik qisuariartarput. Misigissutsit anisinneqarsinnaasarput. Ilaat misigisimasartik pillugu oqaasinnguisinnaanngillat. Taakku kiserliortutut tamannalu kanngunartutut misigisimasinnaavaat, tamannami timikkut suli malugisinnaavaat.
Kingunerluutinik nalaataqaqqikkaanni qanoq pisoqartarpa?
- Tamanna inummiit inummut assigiinngissinnaavoq. Timilli eqqaamavaa. Misigisimasarmi uteqqissinnaavoq annikitsukkaaraluartumilluunniit. Amerlasuulli misigissusaat sakkortusinnaapput, tamannalu oqaasertaleruminaassinnaalluni.
AAMMA ATUARUK Arnat spiralilersorneqarsimanerminnik kingunerlutsitsisut ikiorserneqarneqalersut
Meeraanermit kingunerluutinik nalaataqaqqinnerup suut kingunerluutigisinnaavai?
- Timiinneq ajornakusuungaatsiarsinnaavoq. Kingunerluuteqarneq initoorujussuusarpoq. Tassa imaappoq maanna susoqarnera taamanilu misigisimasap immikkoortinnissaat ajornakusoorpoq.
Tamanna qanoq qisuariarfigineqassava?
- Ajornakusoorsinnaavoq. Timip tusarnaarnissaa pingaaruteqarpoq. Pisariaqartikkukkulu katsorsaasumik oqaloqateqarlutit. Eqqissisimaniarsarigit anersaartorluarlutillu. Qanigisatillu oqaloqatigikkit.
Oqaloqateqarnissat pisariaqartikkukku Tusaanngamut sianersinnaavutit.
Oqarasuaataata normua tassaavoq 801180.
Sianernermi kinaanerit oqaatigisariaqanngilaq, sianernerlu akeqarani.
Ammasarfii:
Sapaammit - sisamanngornermut 9:00 - 00:00
Tallimanngornermi - arfininngornermilu 09:00 - 04:00
Spiralilersuisoqarnera qulaajarneqarnissaa
Peqqinnissamut naalakkersuisoq, Mimi Karlsen (IA) katsorsaasoqarnissaanik neqerooruteqartitsisuuvoq.
Taassuma oqarnera naapertorlugu tamanna arnanut spiralilersorneqarnermi kingorna kingunerluuteqartunut neqeroorutaavoq.
Spiralilersuisoqarsimanerata saqqummiunneqarnera annertussusaalu nunatsinni aalassassutigineqarpoq.
AAMMA ATUARUK Mimi Karlsen: Spiralilersuisimanermik qulaajaaneq ajornakusuussaaq
Inatsisartut 1960-ikkut qiteqqunnerannik 1991-ip naajartorneranut spiralilersuisoqarsimaneranik qulaajaasoqarnissaa danskit naalakkersuisuinut piumasariniarlugu sisamanngornermi isumaqatigiissutigaat.
Peqqinnissamut oqartussaaffik 1991-imi nunatta akisussaaffigilerpaa – taamaammat qulaajaasoqarnera 1970-ikkunnit 1991-imut tunngassaaq.